रेडियो मिसन, हेलम्बु ।
श्री महेन्द्र माध्यमिक विद्यालय हेलम्बु गाउँपालिका ६ सिन्धुपाल्चोकको ६२ औं वार्षिक उत्सव तथा १९ औं अभिभावक सम्मेलन एवं १३ औं आजीवन सदस्य भेला सम्पन्न भएको छ ।
हेलम्बु गाउँपालिका अध्यक्ष निमा ग्याल्जेन शेर्पाको प्रमुख आतिथ्यमा भएको कार्यक्रममा गाउँपालिका अध्यक्ष शेर्पाले गुणस्तरीय शिक्षा प्रदानका लागि गाउँपालिकाले गरिरहेका कामका बारेमा जानकारी गराउनुभयो । उहाँले हेलम्बुमा शिक्षाको सुधारका लागि गाउँपालिका लागि परेको भन्दै यसका लागि सम्पूर्ण विद्यालय, शिक्षक, अभिभावक, विद्यार्थी, विभिन्न राजनीतिक दल लगायतले सहयोग गर्नुपर्ने बताउनुभयो ।
उहाँले विद्यालयमा देखा परेका समस्या समाधानका लागि गाउँपालिका सधै तयार रहेको उल्लेख गर्दै शिक्षा सुधार गर्ने योजनामा साथ दिन आग्रह समेत गर्नुभयो । कार्यक्रमका विशेष अतिथि राष्ट्रिय ब्यापार सङ्घका अध्यक्ष सुरज कुमार श्रेष्ठ, वडा नम्बर ६ का वडा अध्यक्ष सञ्चमान तामाङ, ७ का अध्यक्ष निल बहादुर खड्का लगायतले आफ्नो भनाई राख्नु भएको थियो ।
कार्यक्रममा विद्यालय व्यवस्थापन समितिका अध्यक्ष भरत थापाले विद्यालयको समस्या, आगामी योजना लगायतका बारेमा आफ्नो भनाई राख्नुभएको थियो भने प्रधानाध्यापक उद्धव लामिछानेले वार्षिक प्रगति प्रतिवेदन प्रस्तुत गर्नुभयो । कार्यक्रममा लोक गायक पदम दुलाल, आशा लामा लगायतले आफ्नो प्रस्तुती प्रस्तुत गर्नुभएको थियो भने विद्यार्थीहरूको प्रतिभाले दर्शकहरूलाई मनोरञ्जन प्रदान गरेको थियो ।
कार्यक्रममा जनप्रतिनिधि, विभिन्न सङ्घसंस्थाका प्रतिनिधि, शिक्षासेवि, सरोकारवाला लगायतको उपस्थिति रहेको थियो ।
