मेलम्ची नगरपालिका वडा नम्बर ७ ले काठमाडौँमा बसोबास गर्ने वडाका ज्येष्ठ नागरिकहरूको सामाजिक सुरक्षा भत्ताका लागि कागजात नवीकरण गरिदिएको छ ।
ज्येष्ठ नागरिकहरूको सहजताका लागि वडाले शनिवार काठमाडौँको दक्षिणढोकामा भेला गरी सामाजिक सुरक्षा भत्ताका लागि कागजात नवीकरण गरिदिएको हो । ज्येष्ठ नागरिक,शारीरिक रुपमा अशक्त भएकाहरूको घर घरमा पुगेर सामाजिक सुरक्षा भत्ताका लागि कागजात नवीकरण गरिदिएपछि ज्येष्ठ नागरिकहरू हर्षित भएका छन् । दैलोमै आएर सामाजिक सुरक्षा भत्ताका लागि कागजात नवीकरण गरिदिएपछि मनमाया श्रेष्ठ खुसी व्यक्त गर्नुभयाे ।
स्थानीय तहको काम कर्तव्य बल्ल आम जनताले अनुभूत गर्न पाएको उहाँको भनाइ छ । पिढीबाट सुरु गरेको सामाजिक भत्ता नवीकरणलाई व्यवस्थित बनाउन कार्यक्रम आयोजना गरिएको वडाध्यक्ष पासाङ तामाङले बताउनुभयो । ज्येष्ठ नागरिकहरू, शारीरिक रुपमा अशक्त भएकाहरूलाई लक्षित गरी आयोजना गरिएको कार्यक्रमले स्थानीय सरकारको प्रभावकारिता देखिएको उहाँले बताउनुभयो । कार्यक्रमलाई थप व्यवस्थित बनाउन वडाले आगामी दिनहरूमा नयाँ नीति ल्याउने उहाँको भनाइ छ ।
नवीकरण अभियानमा ४० जनाको विवरण अद्यावधिक भएको वडा सदस्य श्रीकृष्ण श्रेष्ठले जानकारी दिनुभयो । उहाँले बाँकी रहेका ज्येष्ठ नागरिकहरूको घर घरमै पुगेर नवीकरण गरिने बताउनुभयो । वडाले घरघरमै आएर विवरण अद्यावधिक गरेपछि वृद्धवृद्धा, अशक्त भएकाहरूलाई राहत मिलेको छ ।
