रेडियो मिसन, मेलम्ची ।
मेलम्ची नगरपालिका वडा नं ११ मा प्रस्ताव गरिएको फट्टे पुल आयोजनाको संक्षिप्त वातावरणीय अध्ययनको मस्यौदा प्रतिवेदन सम्बन्धमा सार्वजनिक सुनुवाइ कार्यक्रम गरिएको छ । मेलम्ची नगरपालिकाको आयोजनामा सोमबार सार्वजनिक सुनुवाइ गरिएको हो । प्राविधिक सहयोग स्टारलाइन मल्टी कन्सल्टेन्सी प्रा.ली ले गरेको थियो ।
मेलम्ची ११ फट्टेमा बन्ने पुलको लागत ३७ करोड १७ लाख ४९ हजार रहेको छ । मेलम्ची नगरपालिकाले आफ्नै आन्तरिक स्रोत बाट पुल बनाउन लागेको हो । सबै कुराहरू समयमै व्यवस्थापन भएमा पुल बन्न १८ महिना लाग्ने प्राविधिकहरूले जानकारी दिएका छन् । कुनै बाधाहरू आए वा समयमा रकम निकासा हुन नसकेमा पुल बन्न २ वर्ष लाग्ने इन्जिनियर प्रत्युस झाले जानकारी दिनुभयो ।
२०७८ सालमा मेलम्ची नदिमा आएको बाढीले फट्टेको पुल भत्काएको थियो । पुल भत्काएपछि स्थानीयलाई आवतजावत गर्न गठिन भएको छ । यस पुलले दुवाचौर, पाल्चोक, हेलम्बु, पाँचपोखरी थाङपाल गाउँपालिका पुग्ने सडक जोडेको थियो ।
पुल भत्किएपछि दैनिक आवतजावत गर्ने हजारौँ यात्रुहरूलाई मर्का परेको छ । पुल नभएपछि सो स्थानमा अस्थायी संरचना ह्युमपाइप जडान गरेर नगरपालिकाले यातायात सञ्चालनको लागि सहज बनाएको छ । अब सो स्थानमा पक्की पुल बनाउनको लागि नगरपालिकाले बजेट विनियोजन गरिसकेको छ ।
आज सार्वजनिक सुनुवाइ समेत सम्पन्न हुँदा स्थानीय हर्षित भएका छन् । नगरपालिकाले गरेको सार्वजनिक सुनुवाइको स्थानीयले प्रशंसा गरेका छन् । अब छिटै नै पुलको ठेक्का खुल्ने नगरपालिकाले जनाएको छ ।
हाल बन्न लागेको पुलको लम्बाई ९० मिटर रहेको छ । उक्त स्थानमा पहिले ७५ मिटरको आर.सि.सि. पुल थियो ।
कार्यक्रममा स्थानीय राम भक्त दनुवारले पुल बन्न लाग्दा आफूलाई खुसी लागेको बताउनुभयो । “हामी कर्णाली पारी भएका छौँ, पुल बन्दा लाभान्वित हुने छौँ”, दनुवारले भन्नुभयो । पुर्जामा जग्गा भए पनि सुकुम्वासी हुन परेकोमा उहाँले दुःख व्यक्त गर्नुभयो । पहिलाकै ठाउँमा बाटो, पहिलाकै ठाउँमा पुल हुनुपर्छ भनेर आफूले भन्दै आएको र अहिले नगरपालिकाले सोही अनुसार काम गरेकोमा उनले खुसी व्यक्त गर्नुभयो ।
त्यस्तै समाजसेवी राधाकृष्ण श्रेष्ठले मेलम्ची नवलपुरको पुलको जतिकै फट्टेको पुलको महत्त्व भएको बताउनुभयो । पाँचपोखरी, हेलम्बु लगायत पाल्चोक, आमायाङ्री जान र पर्यटकीय हिसाबले फट्टेमा पक्की पुल आवश्यक रहेको बताउनुभयो । “कतिले महत्त्वाकाङ्क्षा भन्लान् तर मेलम्ची नगरपालिकाको हिम्मत र साहसको लागि सलाम छ, यो अत्यावश्यक थियो, यो जरुरी छ”, श्रेष्ठले भन्नुभयो ।
त्यस्तै स्थानीय ज्ञान प्रसाद सापकोटाले मेलम्ची नगरपालिकाले पुल बनाउन ठुलै हिम्मत गरेको बताउनुभयो । “मेलम्ची नगरपालिकाले यति ठुलो पुल बनाउँदै छ । यो पुल नमुना पनि छ”, उहाँले भन्नुभयो । यो पुल नेपालभरिको नमुना पुल बन्ने उहाँको विश्वास छ । “यो पुल छिटो भन्दा छिटो बन्यो भने जनप्रतिनिधिले गरेको साहसले हाम्रो पनि इज्जत बढ्ने छ”, उहाँले भन्नुभयो ।
त्यस्तै व्यवसायी पुष्कर प्रसाद धितालले पुल बन्ने कुरामा सबै व्यवसायी खुसी भएको बताउनुभयो । यस पुलमा काम गर्दा यहाँको लाभान्वित स्थानीयले रोजगारी पाउनुपर्ने धारणा राख्नुभयो ।
मेलम्ची १० का वडा अध्यक्ष अमृत खनालले सबै कार्यपालिका सदस्य मिलेर पुल बनाउने निर्णय लिइएको जानकारी दिनुभयो । “यो निर्णय गर्दा धेरै चुनौती लिइएको छ, हामीले धेरै कुराहरू त्यागेका छौँ”, खनालले भन्नुभयो । सङ्घ र प्रदेशले गर्नुपर्ने काम नगरले गरेर चुनौती मोलेको खनालले बताउनुभयो । मुआब्जाको कारण यो पुल रोकिन नहुने उहाँले धारणा राख्नुभयो । ‘मुआब्जाको कुरा आयो भने यो पुल अम्बोटेमा बनाउनुहोस्, मुआब्जाको जिम्मा म लिन्छु’, उहाँले भन्नुभयो ।
सार्वजनिक सुनुवाइमा आएका सुझाव र जिज्ञासाको बारेमा धारणा राख्दै मेलम्ची नगरपालिकाका उप प्रमुख उमा प्रधानले यो पुल नगरको गौरवको योजना भएको बताउनुभयो । “दिगो विकासको आधार नै पर्यटन हो, देशभरिकै पर्यटक लक्षित गरेर यो प्रोजेक्ट गर्ने निर्णय लिइएको हो”, प्रधानले भन्नुभयो । यहाँ पुल बन्यो भने व्यवसाय प्रवर्द्धन हुने, बजार सम्म उत्पादित सामान लैजान सजिलो हुने उपमेयर प्रधानले बताउनुभयो । “यो प्रोजेक्ट सफल हुनु नै नगरपालिकाको गौरवको कुरा हो”, उहाँले भन्नुभयो ।
सार्वजनिक सुनुवाइ कार्यक्रममा उठेका प्रश्न र जिज्ञासा माथि प्रकाश पार्दै मेलम्ची नगरपालिकाका प्रमुख आइतमान तामाङले पुल पुरानै ठाउँमा बन्न लागेको हुँदा समस्या नआउने विश्वास व्यक्त गर्नुभयो । बाढी गएको २ वर्ष हुँदा समेत सङ्घले पुल बनाउन चासो नदेखाएकाले प्राविधिकहरू सँग सल्लाह गरी पुल बनाउन लागिएको तामाङले जानकारी दिनुभयो । पुल बनाउँदा यहाँको बस्ती पनि संरक्षण हुने तामाङको विश्वास छ । आन्तरिक स्रोत बाट यति ठुलो लगानीमा पुल बनाउने मेलम्ची नगरपालिका देशकै पहिलो भएको उनले दाबी गर्नुभयो । “हामीले ३ वर्ष लाग्छ भन्ने सोचेका थियौँ तर २ वर्ष भित्रमै पुल बन्ने भयो”, मेयर तामाङले भन्नुभयो ‘कसैले पुल बनाउँदैन भन्ने भ्रम फैलाएको छ भने त्यो भ्रम हो’ ।
त्यस्तै कार्यक्रमको समापन गर्दै मेलम्ची ११ का वडा अध्यक्ष चन्द्र बहादुर तामाङले सङ्घ र प्रदेशले बेवास्ता गरेपछि नगर आफै पुल बनाउन लागेको जानकारी दिनुभयो । सिँचाइ, खानेपानी, सडक लगायत धेरै कुरामा नगरमा समस्या भए पनि पुल अत्यावश्यक भएकाले पक्की पुल पहिलो प्राथमिकतामा परेको उनले जानकारी दिनुभयो । “पुल बनाउँदा वातावरणीय हिसाबले कुनै समस्या देखिएको छैन । प्राविधिक स्टमिट अनुसार समयमै पुल निर्माण हुन्छ”, उहाँले भन्नुभयो ।
सार्वजनिक सुनुवाइ कार्यक्रम नगर प्रमुख आइतमान तामाङको प्रमुख आतिथ्यता र मेलम्ची ११ का वडा अध्यक्ष चन्द्र बहादुर तामाङको सभापतित्वमा भएको हो । कार्यक्रममा वडा अध्यक्षहरु नगेन्द्र प्रसाद खतिवडा, राजु रायमाझी, जितबहादुर तामाङ, अमृत खनाल, गणेश तामाङ, प्रशासकीय अधिकृत झपेन्द्र खरेल, इन्जिनियर लगायतका कर्मचारी, पत्रकार र स्थानीयको सहभागिता थियो ।
