रेडियो मिसन ।
२०७२ साल बैशाख १२ गतेको भूकम्पले विनाश गरेको चौताराको कृष्ण मन्दिरमा पुनः भजन शुरु गर्न स्थानीयवासीलाई प्रशिक्षण शुरु गरिएको छ ।
स्थानीय सम्पदा संरक्षण गुथिको आयोजनामा शुरु गरिएको प्रशिक्षणका लागि काठमाडौँको ज्यापु संस्कृति विकास कोषले विभिन्न बाजाहरू उपलब्ध गराएको छ । प्रशिक्षण श्रीहरि भजन (मृदङ्ग) सुनाकोथीकातर्फबाट प्रदान गरिएको हो । आइतबार पुरानो बजारमा आयोजित कार्यक्रममा कोषका अध्यक्ष मङ्गल कृष्ण सिं साथै अन्य पदाधिकारीले विभिन्न बाद्य सामाग्री हस्तान्तरण गर्नुभयो ।
गुथिका अध्यक्ष रविन्द्र श्रेष्ठको सभापतित्वमा सम्पन्न कार्यक्रममा चौताराका विभिन्न खलः साथै पुचःका पदाधिकारी साथै स्थानीयको उपस्थिति रहेको थियो।
कार्यक्रममा कोषका उपाध्यक्ष सन्त कुमार महर्जनले चौतारामा नेवाः संस्कृतिको पुनरोत्थानमा सहयोग पुर्याउन सकेकोमा खुशी व्यक्त गर्नुभयो।
प्रशिक्षण सुनाकोथीका प्रशिक्षकद्वय सुरेन्द्र महर्जन र उमेश महर्जनले प्रदान गर्नुभएको छ। कार्यक्रमले भूकम्पपछि चौताराको कृष्ण मन्दिरमा टुटेको भजन संस्कृतिलाई निरन्तरता दिन उपयोगी हुनेमा स्थानीयले आशा व्यक्त गरेका छन् ।
