रेडियो मिसन ।
पाँचपोखरी थाङपाल गाउँपालिका दलित समन्वय समितिद्वारा आयोजित क्षमता अभिवृद्धि तथा नेतृत्व विकास तालिम सोमबार सम्पन्न भएको छ ।
समापन कार्यक्रमका प्रमुख अतिथि पालिका उपाध्यक्ष सुनिता अधिकारीले सहभागीहरुलाई प्रमाणपत्र प्रदान गर्नुभयो । सो कार्यक्रमा उहाँले सहभागीहरुलाई सिकेका कुरा व्यवहारमा लागू गर्नका लागि अनुरोध गर्नुभयो । व्यवहार परिवर्तनबाट नै समाजमा परिवर्तन आउने कुरामा जोड दिँदै समाज सुधारका लागि सबै जना लाग्नुपर्नेमा जोड दिनुभयो ।
प्रमुख प्रशिक्षक तथा रेडियो मेलम्चीका अध्यक्ष डम्बर रसिक भारतीले सहभागीहरुलाई शुभकामना दिँदै आत्मविश्वासका साथ निरन्तर आफ्नो लक्ष्यमा लाग्न जोड दिनुभयो । कार्यक्रममा सहजकर्ता दिपक परियार, कार्यपालिका सदस्य बिमला बिक, सहभागीका तर्फबाट पत्रुश बिशुंखे, संगीता विक, गमला मिजार, कविता विक र गंगा बोगटीले मन्तव्य राख्नुभयो ।
पाँच दिनसम्म सञ्चालित सो तालिममा व्यक्तित्व विकास, नेतृत्व विकास, भाषण तथा उद्घोषण कला लगायतका विषयमा डम्बर रसिक भारती, दिपक परियार र धनबहादुर विकले प्रशिक्षण दिएको समन्वय समितिका अध्यक्ष शम्भु विकले जानकारी दिनुभयो । समितिका उपाध्यक्ष सुन्तली बिशुंखेले स्वागत मन्तव्य राख्नुभएको समापन कार्यक्रम सहभागी स्वस्तिका बयलकोटीले सञ्चालन गर्नुभएको थियो ।
