हेल्पले इन्द्रावती गाउँपालिका वडा नम्बर ११का ३ विद्यालयमा झोला लगायत शैक्षिक सामग्री वितरण गरेको छ । इन्द्रावती गाउँपालिका ११ बोर्डगाउँ स्थित सेतीदेवी माध्यमिक विद्यालय,परोपकार आधारभूत विद्यालय र बिसदेउटार आधारभूत विद्यालयका गरि ३२२ जना विद्यार्थीलाई सामग्री वितरण गरिएको हो ।
कार्यक्रमका प्रमुख अतिथि इन्द्रावती गाउँपालिकाका अध्यक्ष झम्क नेपालले अति सीमान्तकृत जनजातिका बालबालिकाले गुणस्तरीय शिक्षा पाउन भन्ने उदेश्यले गरिएको सहयोग प्रति उहाँले धन्यवाद व्यक्त गर्नुभयो । उहाँले शिक्षा विना समाज र समुदायका कुनैपनि विकास संभव नभएको भन्दै शैक्षिक समृद्धिको आवस्यकता रहेको बताउनुभयो । अध्यक्ष नेपालले शिक्षालाई गाउँपालिकाले प्रमुख प्राथमिकता दिएको जानकारी दिदै सिकाइ उपलब्धीलाई वृद्धि गर्ने उदेश्यले शिक्षाका क्षेत्रमा गाउँपालिकाले गरेका कामका बारेमा जानकारी गराउनुभयो । पालिकामा रहेका ४२ वटा सामुदायिक विद्यालयको शैक्षिक उपलब्धीलाई आगामी शैक्षिकसत्रमा ७० प्रतिशत पुर्याउने उदेश्यले अहिले काम भरहेको दावी गर्नुभयो । दक्ष शिक्षक,कुशल अभिभावक,जागरुक विद्यार्थी भएमा मात्र शिक्षाको गुणस्तर वृद्धि हुने भएकाले सोही अनुसार योजनाबद्ध भएर कार्यगर्न आग्रह गर्नुभयो ।
जिमि लामाले संस्थाले शैक्षिक क्षेत्रमा गरिरहेका कामको बारेमा जानकारी गराउदै २२ हजार ३०८ जना विद्यार्थीहरु माझ यस्ता कार्यक्रम पुगेको जानकारी दिनुभयो । उहाँले सामुदायिक विद्यालयमा विद्यार्थीलाई टिकाउन शिक्षा प्रतिको लगाव बढाउनका लागी यस्ता कार्यक्रम गरिएको प्रष्ट पार्नुभयो । उहाँले शिक्षाको महत्त्व बारे बुझाउदै अभिभावक हरुमा आफ्नो बालबालिकाको भविष्य बारे चासो र चिन्ता गर्न आग्रह गर्नुभयो । भविष्यको मार्गनिर्देश गर्ने विद्यालयले नै भएकाले शिक्षक,अभिभावक र विद्यार्थीहरुमा अहिलेनै मिहेनत गर्न आग्रह गर्नुभयो ।
कार्यक्रममा आफ्नो भर्ना राख्दै इन्द्रावती गाउँपालिका वडा नम्बर ११ का वडा अध्यक्ष रामजी माझीले विद्यार्थीलाई निरन्तर विद्यालय पठाउन अभिभावकहरूलाई आग्रह गर्नुभएको छ । साथै बालबालिकाको निगरानी गर्न पनि उहाँले सुझाउनुभएको छ । संस्थागत विद्यालयमा पढेर मात्र प्रगति गर्न सकिन्छ भन्ने भ्रमलाई त्याग्नुपर्नेमा उहाँको जोड थियो । सरकारी विद्यालयलाई सुधार गर्न सबै अभिभावक, विद्यार्थी र शिक्षक सबैको भूमिका बराबर रहेको पनि उहाँले बताउनुभएको छ । इन्द्रावतीका जनजातिलाई प्राथमिकतामा राखेर निशुल्क शिक्षा दिने वातावरण बनाउनु आजको आवश्यकता रहेको उहाँले बताउनुभयो । कृषि र रोजगारमा प्रोत्साहन गर्न सके मात्र माझी समुदायका बालबालिकाहरूलाई लाभ हुने उहाँको भनाई थियो । एकजना पनि माझीले शिक्षकको जागिर नखाएकोले अबको दिनमा त्यसको अन्त्य गरी बगर र खाडीमा पसिना बगाउने दीनको अन्त्य गर्नुपर्नेमा उहाँले जोड दिनुभयो ।
यस्तै कार्यक्रममा आफ्नो भनाई राख्दै पूर्व वडा अध्यक्ष मने माझी शैक्षिक स्तर माथि पुर्याउन यस्ता शैक्षिक सामाग्रीले मद्दत गर्ने बताउनुभएको छ । शिक्षा आर्जन गर्न विद्यालयमा नियमित रूपमा विद्यार्थीहरू उपस्थित हुन जरूरी रहेकोमा उहाँले जोड दिनुभएको छ ।
कार्यक्रममा स्वागत मन्तव्य राख्दै प्रधानाध्यापक तोप प्रसाद नेपालले शिक्षाको विकासको लागि सबैको आ आफ्नो ठाउँबाट योगदान गर्नुपर्ने बताउनुभएको छ । शैक्षिक स्तरलाई अभिवृद्धि गर्न शैक्षिक सामाग्री र ब्याग हेल्पले प्रदान गरेकोप्रति आभारी रहेको उहाँले बताउनुभयो ।
विद्यालय ब्यबस्थापन समितीका अध्यक्ष मोहन माझीको अध्यक्षतामा भएको कार्यक्रममा उहाँले विद्यालयलाइ १२ कक्षा सम्म सञ्चालन गर्नुपर्नेमा जाेड दिनुभएकाे छ । साथै यसकाे लागि पहल गरिदिन गाउँपालिकालाइ अनुराेध गर्नुभएकाे छ ।
