बागमती प्रदेशका सांसद कृष्ण कुमार तामाङको प्रमुख आतिथ्यतामा मेलम्ची नगरपालिका ५ मा भव्य तिज कार्यक्रम गरिएको छ । सिद्देश्वरी युवा क्लब मेलम्ची ५ द्वारा आयोजित तिज विशेष कार्यक्रममा मेलम्ची ५ का वडा अध्यक्ष राजु रायमाझीको विशेष आतिथ्यता रहेको थियो ।
सोमवार सम्पन्न भएको कार्यक्रममा सयौँ महिलाहरूले तिजको गीतमा नाचेर मनोरञ्जन गरेका थिए । कार्यक्रममा राष्ट्रिय कलाकारहरू लगायत स्थानीय कलाकारले मनोरञ्जन दिलाएका थिए । कार्यक्रममा प्रमुख अतिथि सांसद तामाङले हिन्दु महिलाहरूको महान चाड हरितालिका तीजको अवसरमा आयोजना गरिएको तिज विशेष कार्यक्रममा तीजको शुभकामना व्यक्त गर्दै संस्कृतिको संरक्षण र विकासमा सबैको हातेमालो हुनु पर्ने बताउनुभयो ।
जग्गा व्यवस्थापन गरेमा सिद्देश्वरी युवा क्लबको भवन बनाउन आफू तयार रहेको उहाँको भनाई छ । ३ वटा सिँचाइ योजना, खानेपानी योजना लगायतका योजनाहरू आफूले यस वर्ष अघि सारेको तामाङले जानकारी दिनुभयो ।
कार्यक्रमलाई सम्बोधन गर्दै वडा अध्यक्ष राजु रायमाझीले तिज जस्ता पर्वले सबैलाई एक ठाउँमा जोड्न मद्दत गर्ने बताउनुभयो । साथै उहाँले समग्र सिन्धुकोटको विकासको लागि सबैको सर सल्लाह लिएर अघि बढ्ने बताउनुभयो ।
कार्यक्रममा बाेल्दै क्लबका अध्यक्ष ध्रूव ढकालले क्लबले यस क्षेत्रमा सचेतनाका कामहरू लगायत विभिन्न सामाजिक कामहरू गर्दै आएकाे बताउनुभयाे । क्लबकाे हाल भवन र साउन्ड सिस्टम नभएकाे कारण कार्यक्रम गर्न कठिन भएकाे कुरा अवगत गराउनुभएकाे थियाे । क्लबले बर्सेनि तीज लगायतका सांस्कृतिक पर्वहरू समेत मनाउँदै आएकाे छ ।
कार्यक्रममा मेलम्ची ५ का वडा सदस्यहरू, पूर्व जनप्रतिनिधि, राजनीतिक दलका प्रतिनिधि, प्रहरी, पत्रकार, समाजसेवी, स्थानीय महिला एवं पुरुषहरूको सहभागिता रहेको थियो । क्लबका अध्यक्ष ध्रुव ढकालको अध्यक्षतामा सम्पन्न कार्यक्रममा ७० बर्ष कटेका जेष्ठ नागरीकहरुलाई सम्मान पनि गरीएको थियो ।
