नेकपा एमालेका नेता एवं पूर्वमन्त्री शेरबहादुर तामाङले मुलुकमा राजनीतिक स्थायित्व खोज्ने हो भने एमाले र कांग्रेस मिलेर सरकार बनाउन आवश्यक रहेको बताउनुभएको छ । देशमा धेरै राजनीतिक दलका कारण अस्थिरता निम्तिरहेको उहाँले बताउनुभएको छ ।
नेकपा (एमाले) अहिले सरकार गठनको पक्षमा नरहे पनि मुलुकमा राजनीतिक स्थायित्वका लागि आफुले प्रश्ताव गर्न चाहेको उहाँले बताउनुभएको छ । दुई राजनीतिक पार्टी मिल्न सके करिब–करिब दुई तिहाइको स्थिति आउने उहाँले बताउनुभएको छ ।
अहिलेको सरकारको आयु कांग्रेस ब्युँझिएको दिनसम्ममात्रै बाँकी रहने उनको टिप्पणी छ । कांग्रेस अहिले चिर निन्द्रामा रहेको र कहिले काहीँ ब्युँझिएकोजस्तो ग¥यो भने पनि भ्रष्टाचार मुछिएको आफ्ना मान्छे जोगाउनमै रुमलिएको उहाँले बताउनुभयो ।
कांग्रेस नब्युँझिएकै कारण कोशी प्रदेश सरकार गठनका क्रममा संविधान उल्लङ्घन भएको उहाँले बताउनुभयो । अहिले कांग्रेस सुतिरहेको र देशमा के भइरहेको छ भन्ने केही पनि थाहै नपाएको उहाँको भनाई छ । देशको प्रमुख र पहिलो पार्टी यस्तो ढंगले किंकर्तव्यविमूढ बनेर बस्न नहुने उहाँको भनाई छ ।
तामाङले अहिलेको सरकारले सुशासनलाई केवल स्टन्टमात्रै बनाएको दाबी गर्नुभयोे । उहाँले सरकारले ललिता निवास, सुन तस्करी, नक्कली भुटानी शरणार्थी प्रकरण लगायतका विषयलाई निष्कर्षमा पुर्याउन नसक्ने बताउनुभयो ।
राजधानीमा आयोजित साक्षात्कार कार्यक्रममा बोल्दै तामाङले भुटानी शरणार्थी प्रकरणमा अनुसन्धानको सुई घुमेर सम्भावित देखिएका मान्छेहरूलाई अलग्गै बाहिर राखेर अभियोजन दर्ता भएको आरोप लगाउनुभयो । उहाँले सम्भावित मानिसहरूलाई अनुसन्धानको दायरामा नल्याई अभियोजन हुनुले उक्त प्रकरण अन्तिम निष्कर्षमा पुग्दैन भन्ने एमालेको निष्कर्ष रहेको बताउनुभयो ।
नेपालमा अहिले पछिल्लो समय धार्मिक र जातीय द्वन्द्व फैलिने वा फैलाउने खालको गतिविधि सुरु भएको भन्दै उहाँले दुःख व्यक्त गर्नुभयो ।
