रेडियो मिसन, नवलपुर ।
इन्द्रावती गाउँपालिकाद्वारा आयोजित तेस्रो अध्यक्ष रनिङ कप प्रतियोगिताको आज पहिलो दिन ५ खेल भएका छन् । आज भएका ५ खेल मध्ये ३ खेल पेनाल्टी सुट आउटमा धकेलिएको थियो । वडा नम्बर ४ र ८, १० र ३ तथा ७ र ५ ले निर्धारित समयमा बराबरी खेलेपछि खेल पेनाल्टीमा गएको हो । पेनाल्टी सुट आउटमा वडा नम्बर ८ ३ र ५ लाई पराजित गर्दै क्रमश वडा नम्बर ४, १० र ७ ले जित हात पारेको छ ।
आजै भएको अर्को खेलमा त्यस्तै वडा नम्बर ११ ले वडा नम्बर १ लाई र १२ ले २ लाई हराएको छ । वडा नम्बर ११ ले वडा नम्बर १ लाई ५–० गोलले पराजित गरेको छ भने वडा नम्बर १२ ले २ लाई १ ० गोल अन्तरले पराजित गरेको छ ।
७ नम्बर वडामा रहेको शहीद स्मृति खेलकुद मैदानमा सुरु भएको प्रतियोगिताको आज इन्द्रावती गाउपालिका अध्यक्ष झम्क नाथ नेपालले उद्घाटन गर्नुभएको हो । उद्घाटन कार्यक्रममा बोल्दै पालिका अध्यक्ष नेपालले खेल क्षेत्रको पनि पालिका विकासमा उत्तिकै भुमिका हुने भएकाले हरेक क्षेत्रलाई सरह यसलाई पनि उत्तिकै महत्व दिएको बताउनुभयो । खेल क्षेत्रले पनि पालिका समृद्ध हुने आधार निर्माणका लागि टेवा पुर्याउने भएकाले यसलाई पनि महत्वपूर्ण ढङ्गले हेर्न सबैलाई आग्रह समेत गर्नुभयो । कार्यक्रममा इन्द्रावती गाउँपालिका प्रवक्ता एवं वडा नम्बर ५ का अध्यक्ष शशिनाथ आचार्यले खेल, खेल जस्तो हुनुपर्ने बताउनुभयो ।
मंगलबार सम्म सञ्चालन हुने प्रतियोगिताको विजेताले एक लाख नगद प्राप्त गर्नेछ । त्यस्तै दोस्रो हुनेले ६० हजार र तेस्रो हुनेलाई ४० हजार नगद पाउने इन्द्रावती गाउँपालिकाले जनाएको छ ।
