गरिबी निवारणका लागि लघु उद्यम विकास कार्यक्रम अन्तर्गत पाँचपोखरी थाङ्पाल गाउँपालिका -४ का महिलाहरुलाई खोस्टाबाट चकटि बुन्ने ७ दिने सिपमुलक तालिम सम्पन्न भएको छ ।
समापन कार्यक्रमलाई सम्बोधन गर्नुहुँदै गाउँपालिका अध्यक्ष टासी लामाले परम्परागत सिपहरुलाई संरक्षण गर्न यस तालिमको आयोजना गरिएको बताउनुभयो ।अहिले पुराना चिजहरुको महत बढ्दै गएको बताउँदै यसको संरक्षणमा पालिका लागि परेको बताउनुभयो । उहाँले पालिकामा संग्राहलय निर्माण गरिएकाले केहि पुराना ,महत्त्वपूर्ण सामग्री भए उपलब्ध गराउन आग्रह गर्नुभयो । उहाँले सिप सिक्ने र व्यवहारमा लागु नगर्ने परिपाटी रहेकाले यसको अन्त्य गर्नुपर्नेमा लामाले जोड दिनुभयो ।हरेक वडामा राडी बुनाई , अचार बनाउने लगायत तालिम पालिकाले उपलब्ध गराउदै आएको उहाँले बताउनुभयो ।
उहाँले उत्पादन गरिएको सामग्री स्थानीय स्तरमै उपभोग गरिने तथा अन्य स्थानमा बिक्रीको लागि पालिकाले सहयोग गर्ने उहाँले बताउनुभयो ।
वडा नं ४ का अध्यक्ष कुलबहादुर बस्नेतले खेर जाने र आफ्नो गाउँमा उपलब्ध सामग्रीहरुको सदुपयोग गरि आयआर्जन गर्न सकिने बताउनुभयो ।उहाँले आफुले सिकेका तालिम तालिममा मात्र सिमित नराखी व्यवहारमा लागु गर्न आग्रह गर्नुभयो ।
पाँचपोखरी थाङपाल गाँउपालिका-४ का वडा सदस्य अंकमाया तामाङले महिलाहरुलाई सिप सिकेर आत्मनिर्भर बन्न आग्रह गर्दै सिकेका तालिमलाई व्यबहारमा उतार्न आग्रह गर्नुभयो ।
तालिमको सहभागी देवकी महतले लोप हुँदै गैरहेको खोस्टाको चकटि बनाउने तालिम उपलब्धि मुलक भएको बताउँदै बजार राम्रो पाए काम गर्न आफुहरु उत्साहित रहेको उहाँले बताउनुभयो ।
त्यस्तै अर्का सहभागी सरला श्रेष्ठले तालिमका लागि पालिकालाई धन्यवाद ज्ञापन गर्दै यस्तै परंरागत सिप जोगाउँदै जानुपर्नेमा जोड दिनुभयो। उहाँले सिपमुलक तालिमले महिलाको आयअर्जनमा सघाउ पुर्याउने विश्वास व्यक्त गर्नुभयो ।
प्रशिक्षक संचिता लिम्बुले महिलाहरु सक्रियताका साथ तालिम लिएको बताउँदै यसलाई निरन्तरता दिन आग्रह गर्नुभयो । आफुले सिकेको सिप अरुलाई पनि सिकाउन आग्रह गर्दै सिप सिकेका व्यक्ति कहिले बेरोजगार बस्नु नपर्ने उहाँले बताउनुभयो ।
तालिममा वडाका ४५ महिलाको सहभागीता रहेको पालिकाका उद्यम विकास शाखा प्रमुख दिपेन्द्र पौडेलले जानकारी दिनुभयो । समापन कार्यक्रम मानेखर्क कृषि सहकारीका अध्यक्ष सार्की डोल्मा तामाङको अध्यक्षतामा सम्पन्न भएको हो ।
