हेलम्बु
हेलम्बुमा नुहाएर फर्किने क्रममा खोलाले बगाएर बेपत्ता भएका शिक्षक केशव सिवाकोटीको २२ घण्टापछि उद्धार गरिएको छ । हेलम्बु गाउँपालिका वडा नम्बर १ छ्यादी खोलामा नुहाएर फर्किने क्रममा लेउ लागेको ढुङ्गामा चिप्लिएपछी खोलामा हिजो शनिवार बेपत्ता भएका शिक्षक सिवाकोटीको २२ घण्टापछि उद्धार गरिएको हेलम्बु गाउँपालिकाका अध्यक्ष निमा ग्याल्जेन शेर्पाले जानकारी दिनुभयो ।
दोलखाको कालीञ्चोक गाउँपालिका ३ स्थायी घर भएका सिवाकोटीलाई नेपाली सेनाको हेलिकप्टरबाट उद्धार गरिएको हो । शिक्षक सिवाकोटी ढुङ्गामा अड्किएको अवस्थामा फेला पर्नुभएको थियो ।
भिरबाट सिवाकोटीको आवाज आएपछि उद्धारको पहल थालिएको थियो । उद्धारपछि काठमाण्डौ ल्याएर उहाँको उपचार भइरहेको छ ।
