रेडियो मिसन ।
फोडा मेटामोर्फिक एकेडेमी बलेफी एक जलबिरेको आयोजनामा निःशुल्क प्राथमिक स्वास्थ्य शिविर सम्पन्न भएको छ। शिविरबाट २२५ जनाले सेवा लिएको बिद्यालयका प्रधानाध्यापक बेदलाल दुलालले जानकारी दिनुभयो ।
विद्यालयकी संस्थापक अध्यक्ष रमा रम्तेलको संयोजनमा सम्पन्न शिविरमा १० जना विदेशी डक्टर र ९ जना नेपाली स्वयं सेवक गरी १९ जनाको टोली बाट स्थानीयले सेवा लिएका थिए ।
कार्यक्रमका प्रमुख अतिथि वडा अध्यक्ष हुप बहादुर खड्का ले स्वास्थ्य परीक्षण गराई शिविरको औपचारिक रुपमा उद्घाटन गर्नुभएको थियो। सो अवसरमा आफ्नो भनाइ राख्दै वडा अध्यक्ष खड्काले सबै जलबिरेवासीलाई शिविरबाट स्वास्थ्य लाभ लिन अनुरोध गर्नुभयो साथै शिविरको आयोजना गर्ने फोडा मेटामोर्फिक एकेडेमीप्रति आभार व्यक्त गर्नुभयो।
कार्यक्रम संयोजक तथा विद्यालयका संस्थापक अध्यक्ष रम्तेलले आफ्नो भनाइ राख्दै क्षेत्रका नागरिकलाई रहात पुगोस् भन्ने हेतुले शिविरको आयोजना गरिएको बताउनुभयो ।
शिविरबाट बढी मात्रामा ग्यास्ट्रिक जोर्नी र श्वासप्रश्वास सम्बन्धी समस्या भएकाहरू लाभान्वित भएको उपचारमा संलग्न डाक्टरहरूले बताएका छन्। उनीहरूकाे स्वास्थ्य पिरक्षण गरिनुका साथै निःशुल्क औषधि पनि वितरण गरिएको छ ।
कार्यक्रममा विद्यालयका बाल क्लबका विद्यार्थीहरूले पनि स्वयंसेवकको भूमिका निर्वाह गरी शिविर व्यवस्थित तरिकाले सम्पन्न गरिएको विद्यालयले जनाएको छ ।
शिविर पश्चात् प्रमुख अतिथि, अतिथिहरू तथा उपचारमा संलग्न डाक्टरहरूलाई संयोजक राम्तेलले मायाको चिनो प्रदान गरी बिदाई गरिएको विद्यालयका प्रधानाध्यापक बेदलाल दुलालले जानकारी दिनुभयो ।। साथै अब देखी वर्षमा एकचोटी यस्तै शिविर आयोजना गर्ने बिद्यालयले जनाएको छ ।
