रेडियो मिसन, मेलम्ची
मेलम्चीमा स्वास्थ्य शिविर सम्पन्न भएको छ । विभिन्न् संघ संस्थाको सहयोगमा मेलम्ची नगर अस्पतालमा भएको शिविरमा १२० भन्दा बढीले सेवा लिएका छन् ।
बिकलाङ्ग मित्र समुह, अपांग बाल अस्पताल तथा पुनस्र्थापन केन्द्र बनेपाको आयोजना तथा मेलम्ची नगर अस्पताल र अपांगता सरोकार मञ्च मेलम्चीको सहकार्यमा बाल अपांगता पहिचान, स्वास्थ्य तथा पुर्नस्थापना सम्बन्धी निःशुल्क शिविर सम्पन्न भएको हो । सेवा लिएकामध्ये २० जनाको थप उपचार गर्नुपर्ने भएकाले बनेपा रिफर गरिएको छ ।
अपांगता भएका १८ बर्षसम्मका बालबालिकाको लागि आयोजित स्वास्थ्य घुम्ती शिविरमा मेलम्ची, पाँचपोखरी, हेलम्बु र इन्द्रावती गाउँपालिकाका नागरिकहरुले सेवा लिएका हुन् । शिविरमा जन्मजात खुट्टाको पैतला भित्र फर्केको, खुट्टा लुलो वा कमजोर भएको, औंलाहरु एकआपसमा टाँसिएको, हड्डी पाकेर पिप आरहने लगायतका समस्याको उपचार गरिनुका साथै सहायक सामग्रि र कृत्रिम सामग्रि वितरण गरीएकोे अपांग बाल अस्पतालका सुपर भाईजर लेखनाथ आचार्यले जानकारी दिनुभयो । उहाँले अप्रेशन गर्नुपर्नेको समेत निशुल्क अप्रेशन गर्ने ब्यबस्था रहेको जानकारी दिनुभयो ।
संस्थाले मेलम्चीमा कार्यालय नै स्थापना गरेर विगत देखिनै सेवा दिँदै आएको छ । यसभन्दा अघि पनि यस भेगका विभिन्न स्थानमा शिविर सञ्चालन गर्नुका साथै शिविरमा आउनेको शल्यक्रिया गर्नुपर्ने भएमा निशुल्क शल्यक्रिया गरिएको थियो ।
सेवा लिन आएका सेवाग्राहिले भने ब्यबस्थापनको पाटो फितलो देखिएको बताएका छन् । चर्को घाममा लाइन बस्नपर्ने, आउन जानको समस्या, कर्मचारी अपर्याप्त लगायतको समस्या रहेको सेवाग्राहिले बताएका छन् । आगामि दिनमा सेवासँगै ब्यबस्थापनमा पनि ध्यानदिनुपर्ने सहभागिहरुको सुझाव छ ।
