बलेफी ।
स्वास्थ्य तथा जनसंख्या मन्त्री मोहनबहादुर बस्नेतले चिकित्सा शिक्षा ऐन संसोधन गरेपछि स्वदेशमै चिकित्सा शिक्षा पढ्न पाउने वातावरण बन्ने र युवाहरुको विदेश पलायन रोक्न सकिने बताउनुभएको छ ।
सिन्धुपाल्चोकको बलेफी गाउँपालिका ५ स्थित बलेफी माध्यमिक विद्यालयको ७५ औं वार्षिकोत्सवको अवसरमा सोमबार आयोजित कार्यक्रममा बोल्दै स्वास्थ्य मन्त्री बस्नेतले चिकित्सा शिक्षा अध्ययनका लागि मात्र हरेक वर्ष ठूलो संख्यामा युवायुवती विदेश पलायन भइरहेकाले उनीहरुलाई स्वदेशमै पढ्न पाउने वातावरण बनाउन विद्यमान चिकित्सा शिक्षा ऐन संसोधन आवश्यक रहेको बताउनुभएको हो । नेपालका मेडिकल कलेजहरु र स्वास्थ्य प्रतिष्ठानहरुमा अहिलेको क्षमता भन्दा बढी विद्यार्थीलाई एमविविएस र एमडी पढाउन सक्ने क्षमता भएको दावी गर्दै क्षमता हुदा हुदै पनि स्वदेशमा पढ्न नदिएर युवायुवतीलाई पढ्न कै लागि विदेश पठाउनु सही नभएको मन्त्री बस्नेतले बतउनुभयो।
वर्तमान ऐनकै अव्यवहारिक व्यवस्थाका कारण डाक्टर पढ्न मात्र नभएर नर्स पढ्न पनि विदेश जानेको संख्या उल्लेख्य रहेको भन्दै मन्त्री बस्नेतले भन्नुभयो, ‘ अव सरकारले चाडै चिकित्सा शिक्षा ऐन संसोधन गरेर स्वदेशमै चिकित्सा शिक्षाका सिट बढाउने छ । त्यसपछि चिकित्सा शिक्षा पढ्न विदेश जानेको संख्या घट्ने छ । ’ विदेशी विद्यार्थी समेत नेपाल आएर चिकित्सा शिक्षा पढ्न चाहिरहेको अवस्थामा आफ्ना विद्यार्थीलाई पढ्न कै लागि विदेश पठाउनु स्वभावित नभएको मन्त्री बस्नेतको तर्क छ । उहाँले १०० बेडदेखि ३०० बेडसम्मका अस्पतालमा नर्सको पढाई गर्ने र ३०० बेड भन्दा माथिका अस्पतालमा एमविविएसको पढाई गर्ने गरि व्यवस्था मिलाउन सकिने गरि स्वास्थ्य तथा जनसंख्या मन्त्रालयले प्रस्ताव पास गरेको बताउदै मन्त्रीपरिषद्का अधिकांश सदस्यहरुले प्रस्तावलाई सकारात्मक लिएको बताउनुभएको छ ।
नेपालमा चिकित्सा शिक्षाको विकास गर्ने र ठोस निर्णय गर्ने अहिलेको बेला उयपुक्त भएको बताउदै जनताको हित हुने कुरामा निर्णय गर्न आफू कहिल्यै पछि नपर्ने दावी गर्नुभएको हो । चिकित्सा शिक्षा ऐन तत्काल संसोधन गर्न नसकिए निकट भविश्यमै चिकित्सक र नर्सको अभाव हुने मन्त्री बस्नेतले बताउनुभयो । मन्त्री बस्नेतले कक्षा १२ सम्मको शिक्षा निस्शुल्क हुनु पर्नेमा जोड दिदै अहिलेकै सरकारले कक्षा १२ सम्मको शिक्षा निस्शुल्क गर्ने दावी गर्नुभयो ।
कार्यक्रममा बलेफी गाउँपालिकाका अध्यक्ष गंगाबहादुर तामाङले शिक्षाको विकास नभएसम्म गाउँको विकास संभव नभएकाले विद्यालय शिक्षाको सुधारका लागि सरकारले ठोस नीति ल्याउनु पर्ने बताउनुभयो।
बलेफी गाउँपालिकाका उपाध्यक्ष सरु लामाले कक्षा १२ सम्म निस्शुल्क गर्न गाउँपालिकाले आफ्नो नीति कार्यक्रममा समावेश गरिसकेको भए पनि बजेट अभावले यो वर्ष लागु गर्न नसकिएको जानकारी दिदै आउदो वर्ष लागु गर्ने बताउनुभयो।
कार्यक्रममा नेपाली कांग्रेस बलेफी गाउँपालिकाका अध्यक्ष सुवास तिमल्सिनाले बलेफी माध्यमिक विद्यालयमा अध्ययनरत विद्यार्थीहरुको पढाईमा सुधार ल्याउन आफुले नीजि खर्चमा कोचिङ क्लास पढाउन सहयोग गर्ने बताउनुभयो ।
कार्यक्रममा उत्कृष्ठ नतिजा ल्याउने विद्यार्थीहरुलाई स्वास्थ्य मन्त्री बस्नेतले पुरस्कार तथा प्रमाणपत्र प्रदान गर्नुभएको थियो। कार्यक्रम विद्यालय व्यवस्थापन समितिका अध्यक्ष नारायण खड्काको अध्यक्षतामा सम्पन्न भएको थियो ।
