रेडियो मिसन, नवलपुर ।
इन्द्रावती गाउँपालिकामा स्वास्थ्यकर्मीको लागि वृहत पोषण विशेष प्याकेज सम्बन्धी प्रशिक्षक प्रशिक्षण तालिम सुरु भएको छ । गाउँपालिका भित्रका सबै वडाका स्वास्थ्यकर्मीहरू सहभागी हुने पहिलो चरणको तालिम आजबाट सुरु भएको हो । पहिलो चरणको यस तालिम १५ गते सम्म चल्ने र दोस्रो चरणको तालिम १६ गते देखि २२ गते सम्म सञ्चालन गरिने गाउँपालिकाका स्वास्थ्य शाखा प्रमुख परशुराम श्रेष्ठले जानकारी दिनुभयो ।
पोषण सम्बन्धी विषय वस्तुहरूको एकीकृत वृहत प्याकेज सबन्धी तालिम सञ्चालन गर्न आवश्यक पर्ने ज्ञान सीप तथा व्यवस्थापकीय पक्षको क्षमता अभिवृद्धि गर्ने, पोषण सम्बन्धी व्यवहार सुधारको लागि परामर्श र छलफल विधिद्वारा ज्ञान, सीप र धारणमा सकारात्मक परिवर्तन गर्न प्रोत्साहन गर्ने तथा कुपोषण व्यवस्थापनको लागि प्राविधिक तथा परामर्श सम्बद्ध ज्ञान, सीप र क्षमता विकास गर्ने उद्देश्यका साथ तालिमको आयोजना गरिएको स्वास्थ्य शाखा प्रमुख श्रेष्ठले बताउनुभयो । तालिममा १२ वटा वडाका स्वास्थ्यकर्मीहरू सहभागी छन् ।
यस दुइ चरणको तालिम पश्चात पालिका भरिका ६३ जना महिला स्वेमसेविकाहरुलाई ३ दिने पोषण सम्बन्धी आधारभूत तालिम सञ्चालन गरिने बताइएको छ ।
केन्द्रका पोषण सहजकर्ता आरसी पन्थी, स्वास्थ्य शाखाका सरस्वती खनाल र अस्मिता जिसीले सहजिकरण गर्ने ६ दिने तालिमको आज गाउँपालिका अध्यक्ष झम्कनाथ नेपाल, उपाध्यक्ष सोभना तामाङ, प्रमुख प्रशासकीय अधिकृत राम प्रसाद शर्मा लगायतको उपस्थितिमा सुरुवात गरिएको हो ।
