रेडियो मिसन, नवलपुर ।
इन्द्रावती गाउँपालिका ५ डडुवाखर्कका कृषि उत्पादक कृषक समूहलाई कृषि सामाग्री बितरण गरिएको छ । समुहका २० जना कृषकहरूलाई टनेल लगायतका सामाग्रीहरू बितरण गरिएको हो ।
नेपाल सरकार कृषि तथा पशुपन्क्षी बिकास मन्त्रालय खाद्य तथा पोषण सुरक्षा सुधार आयोजना, आयोजना क्लस्टर इकाई सिन्धुपाल्चोक चौताराको आर्थीक बर्ष २०७९/०८० को नियमित कार्यक्रम अन्तर्गतको पुरक अनुदान कार्यक्रम अनुसार कृषि सामाग्री बितरण गरिएको कृषि प्राविधिक कुबेर सिग्देलले जानकारी दिनुभयो ।
आज एक कार्यक्रमका बिच कृषकहरूलाई २० टनेल, १ मिनिटिलर, १० स्प्रेयर, ५ वटा मकै छोडाउने मेसिन लगायतका सामाग्रीहरू बितरण गरिएको छ । हाल कृषकहरूले बाँसको टनेलको फ्रेम बनाइसकेका छन । समूहका ब्यक्तिहरूको श्रमदान बाट फ्रेम तयार भएको समुहका अध्यक्ष इर बहादुर तामाङले जानकारी दिनुभयो । नेपाल सरकारको ६ लाख लगानी र समुहको १ लाख २० हजारको लगानीमा सो टनेल बन्नुका साथै कृषि सामाग्री बितरण गरिएको हो ।
डडुवाखर्क कृषि उत्पादक कृषक समूहको पहलमा टनेल पर्न सफल भएको समूहका अध्यक्ष इर वहादुर तामाङले बताउनुभयो । यस टनेलले यहाँका समुदायको जिवनस्तर उकास्न सहयोग गर्ने उहाँको बिश्वास छ । “हाम्रो यहाँ मेहनत र परिश्रम परेको छ । पक्कै पनि यसबाट आम्दानी हुने बिस्वास गरेको छु“, उहाँले भन्नुभयो ।
बितरण कार्यक्रममा मन्तब्य राख्दै इन्द्रावती गाउँपालिका उपाध्यक्ष, शोभना तामाङले पालिकाले लिएको लक्ष्य अनुरूपको काम हुँदै गएको बताउनुभयो । यस टनेल खेती बाट समुदायले फाइदा लिएर आयआर्जन गर्न सक्ने उहाँले बताउनुभयो । आत्मनिर्भर हुनको लागि यस्ता कार्यक्रम लाभदायक भएको र पालिकाले २ ठाउँमा कृषि संकलन केन्द्र समेत राख्ने उहाँको भनाई छ ।
प्राविधिक सहायता अन्तर्गत, बालि मूल्य शृङ्खला बिशेषज्ञ विशाल पौडेलले इन्द्रावती गाउँपालिकामा मात्र कृषकहरूको लागि ४ करोड ५० लाख खर्च गरिसकिएको जानकारी दिनुभयो । आयोजनाले सीप सिकाउने, क्षमता अभिबृद्विको तालिम दिने जस्ता काम गरेको र निरन्तर काम गर्दै जान कृषकहरूलाई सल्लाह समेत दिनुभयो । ३ बर्ष भन्दा बढी गाउँपालिकामा काम गरिसकेको उहाँको भनाई छ ।
इन्द्रावती गाउँपालिकाको सहकार्य, स्थानिय साझेदार संस्था सामुदायिक बिकास तथा वातावरण संरक्षण मञ्च (सिडिइसिएफ) को सहजिकरण सहायतामा यश कार्यक्रम इन्द्रावती गाउँपालिकामा सञ्चालित छ ।
