सम्भाव्य फाउन्डेसनले ईन्द्रावती गाउँपालिकामा निःशुल्क मानसिक स्वास्थ्य शिविर सञ्चालन गरेको छ ।
‘सबैका लागि कल्याण’ पहलः ३६५ दिनमा १०० सामुदायिक विद्यालयहरूमा रुपान्तरण कार्यक्रम अन्तर्गत फाउन्डेसनले शिविरमा समुदायका मानिसहरूलाई अत्यावश्यक मानसिक स्वास्थ्य सेवा र औषधि उपलब्ध गराएको फाउन्डेसनका एचआर रागव गौतमले जानकारी दिनुभयाे ।
‘शिविरमा हाम्रो बहु–विषयक टोलीले मनोचिकित्सा परामर्श, सामान्य स्वास्थ्य जाँच, र मनोवैज्ञानिक परामर्श प्रदान गरी, आवश्यकता भएका सबैलाई समग्र हेरचाहको सुनिश्चित गरेका छौं’, गौतमले भन्नुभयाे ।
नेपालका दुर्गम क्षेत्रहरूमा मानसिक स्वास्थ्य अवस्था दिनानुदिन खराब हुँदै गएको, आत्महत्याका घटना बढ्दै गएका, औषधि र परामर्शको पहुँच नहुँदा मानिसहरूले ठूलो चुनौतीको सामना गरिरहेका अवस्थामा फाउन्डेसनले मानसिक स्वास्थ्यको गलत धारणा र भ्रम तोड्दै समुदायमा सबै उमेर समूहका मानिसहरुमा विशेषज्ञ सहयोग खोज्न प्रोत्साहित गर्दै आएको छ ।
कार्यक्रमलाई गाउँपालिका, पालिकाको स्वास्थ्य विभागको पहल तथा नेपाल राइजिङ हिमालयन डिस्टिलरी र लेटर्स टु स्ट्रेन्जर्सले साथ दिएका थिए ।
आगामी दिनमा पनि यस्ता समुदाय हितका कार्यलाई निरन्तरता दिने फाउन्डेसनले जनाएको छ ।
