चौतारा ।
जिल्लाको चौतारा साँगाचोकगढी नगरपालिका–१४ झ्याँडी नमुना माझी वस्तीमा अब नियमित गाडी सञ्चालनमा आउने भएको छ । यात्रुबाहक बस झ्याँडी पुग्दा स्थानीय हषिर्त हुँदै खादा माला सहित बस चालक तथा समितिका पदाधिकारीलाई भब्य स्वागत गरे ।
पूर्व अरनिको यातायात सेवा प्रालिले सो स्थान सम्म शनिबारबाट बस सेवा सुरु गरेको हो । बस सेवाको उद्घघाटन गर्दै पूर्व अरनिको यातायात सेवा प्रालिका उपाध्यक्ष दिनेश श्रेष्ठले स्थानीय युवाहरुको सक्रिय पहल र उत्साहले समितिलाई बस सञ्चालन गर्न प्रेरित गरेको र अब यस रुटमा नियमित बस सेवा सञ्चालन हुने बताउनुभयो ।
उद्घघाटन समारोहका प्रमुख अतिथि चौतारा साँगाचोकगढी नगरपालिका वडा नम्बर १४ का अध्यक्ष उद्दव नेपालले निकै चुनौतीका बिच बस सेवा सञ्चालनमा आएको र अब नियमित बस सेवा सञ्चालनका निमित्त स्थानीय सरकारको तर्फबाट सक्दो सहयोग गर्ने प्रतिबद्धता जनाउनुभयो ।
चौतारा साँगाचोकगढी नगरपालिका वडा नम्बर ११ का निर्वाचित वडा सदस्य नेत्रबिक्रम माझी, वडा नम्बर १४ का निबर्तमान वडा सदस्य मिलन माझी स्थानीय इन्द्रजित माझी, श्रीकृष्ण माझी लगाएत युवाहरू र पूर्व अरनिको यातायात प्रा.लि.का सदस्य तथा यातायात ब्यबसायी जीवन श्रेष्ठको प्रत्यक्ष पहल र सहजीकरणमा अरनिको यातायातले बस सेवा सञ्चालन सुरु भएको बताइएको छ ।
