हेलम्बु गाउँपालिका वडा नम्बर २ किउलमा अवस्थित श्री भूमेस्वरी माध्यमिक विद्यालयको ४९ औँ वार्षिक उत्सव, आजीवन सदस्य भेला तथा अभिभावक सम्मेलन सम्पन्न भएको छ ।
कार्यक्रमका प्रमुख अतिथि हेलम्बु गाउँपालिकाका अध्यक्ष निमा ग्याल्जेन शेर्पाले शिक्षा र स्वास्थ्य क्षेत्रमा लगानी गर्ने कुरामा आफू सधैँ सकारात्मक रहेको बताउनुभयो । अध्यक्ष शेर्पाले प्राविधिक शिक्षालाई गाउँपालिकाले प्राथमिकता राखेको बताउँदै राज्यलाई आवश्यक पर्ने जनशक्ति हेलम्बु गाउँपालिकाले उत्पादन गर्ने गरि अगाडि बढ्ने प्रतिबद्धता जनाउनुभयो ।
शेर्पाले पढ्ने कुरामा विद्यार्थीलाई कुनै पनि समस्या सिर्जना हुन नहुने बताउनुभयो । उहाँले एस इ इ को तयारी गरिरहेका विद्यार्थीहरूबाट कुनै पनि शुल्क नलिन आग्रह गर्नुभयो । उहाँले शैक्षिक हिसाबले कुन स्कुल कुन स्थानमा छ भनेर गाउँपालिकाले मूल्याङ्कन गरिरहेको भन्दै आवश्यक सहजीकरणको लागी गाउँपालिका सधैँ तयार रहेको स्पष्ट पार्नुभयो ।
कार्यक्रममा वडा नम्बर २ का अध्यक्ष पेम्बा लामा,गाउँपालिकाका शिक्षा शाखा प्रमुख धनध्वज लामा,मेलम्ची भ्याली क्याम्पस प्रमुख राजन लामिछाने,छिमेकी विद्यालयका प्रधानाध्यापक देवी श्रेष्ठ लगायतले आफ्नो भनाइ राख्नुभएको थियो । विद्यालयका प्रधानाध्यापक यमबहादुर जोतीले वार्षिक प्रतिवेदन प्रस्तुत गर्नुभएको कार्यक्रममा पुर्व शिक्षक हरूलाई सम्मान गरिएको थियो भने विद्यार्थीहरूले आफ्नो प्रतिभा प्रस्तुत गर्नुभएको थियो ।
वार्षिक उत्सवका अवसरमा विभिन्न विधामा उत्कृष्ट शिक्षक तथा विद्यार्थीहरूलाई समेत सम्मान गरिएको विद्यालयका प्रधानाध्यापक जोतीले जानकारी दिनुभयो ।कार्यक्रम विद्यालय व्यवस्थापन समिति अध्यक्ष मोदनाथ भण्डारीको अध्यक्षतामा सम्पन्न भएको थियो ।
