रेडियो मिसन, नवलपुर ।
राष्ट्रिय कृषक समूह महासंघ नेपालको इन्द्रावती गाउँपालिका स्तरिय भेला सम्पन्न भएको छ । इन्द्रावती गाउँपालिकाका उपाध्यक्ष शोभना तामाङको प्रमुख आतिथ्यता तथा राष्ट्रिय कृषक समूह महासंघका पालिका अध्यक्ष रत्न प्रसाद चौलागाईँ को सभापतित्व र राष्ट्रिय कृषक समूह महासंघ केन्द्रिय अध्यक्ष नमराज बस्नेत प्रदेश अध्यक्ष बिजय लामा त्यसैगरी इन्द्रावती गाउँपालिकाका प्रबक्ता तथा वडा नम्बर ५ का अध्यक्ष शशिनाथ आचार्यको विशेष आतिथ्यतामा भेला भएको हो ।
कार्यक्रमका प्रमुख अतिथि इन्द्रावती गाउँपालिकाका उपाध्यक्ष शोभना तामाङले अनुगमनको क्रममा अनुदानका कामहरू संतोषजनक ढंगले नगरेको पाइएको र यसमा दु:ख लागेको बताउनुभयो । आफू पनि एक किसान परिवारबाटै यो पदमा पुगेको बताउँदै सधैं किसानको साथमै रहने उहाँको भनाई थियो । उहाँले गमलामा रहेको बिरुवामा पानी हालेर भेलाको उद्घाटन गर्नुभएको थियो ।
विशेष अतिथी राष्ट्रिय कृषक समूह महासंघका केन्द्रिय अध्यक्ष नमराज बस्नेतले राष्ट्रिय कृषक समूह महासंघ गैह्र राजनीतिक र कृषक समूहहरुको एउटा छाता संगठन भएको बताउनुभयो । उहाँले किसान र सरकार बिच पुलको काम गर्दै नीति निर्माण तहमा किसान अधिकारको लागी पैरवीको गरिरहेको यस सँस्थाको २०६८ मा स्थापना भएको जानकारी दिनुभयो । हालसम्म नेपालमा धेरैजसो पारिवारिक खेती हुँदै आएको बताउँदै नेपालमा कृषिले लय लिन नसकेको धारणा राख्नुभयो । किसानको हक हितको लागी स्थानीय तहमा पनि कृषि ऐन बन्न जरुरी रहेको र ऐन ठाउँ भुगोल र आवश्यकता अनुसर बन्नुपर्ने अध्यक्ष बस्नेतको भनाई थियो । उहाँले महासंघ के हो ? यसले कसरी काम गर्छ र यसको उद्देश्यको बारेमा प्रष्ट पार्नुभएको थियो ।
कार्यक्रममा अर्गानिक बायो फटिलाइजर मलका उत्पादक अनिश लाल जोशीले रासायनिक मलको प्रयोगले माटोको उर्बरा शक्तिमा ह्रास हुँदै गएकोले प्राङ्गारिक मलको प्रयोग गर्न आवश्यक रहेको बताउनुभयो । साथै वातावरणमैत्री र जैविक खेतीलाई अबलम्बन गर्दै जानुपर्ने उहाँको भनाई छ । अर्गानिक बायो फटिलाइजर के हो ? रासायनिक मल र यसमा के फरक छ र यसले बालिमा पुर्याउने फाइदाको बारेमा चर्चा गर्नुभएको थियो ।
कार्यक्रममा इन्द्रावती गाउँपालिकाका प्रबक्ता तथा वडा नम्बर ५ का अध्यक्ष शशिनाथ आचार्यले अनुदानका कार्यक्रममा गाउँपालिकाले गरेको लगानी अनुसार प्रतिफल आउन नसकेको बताउनुभयो । साथै प्रतिफल आउने गरि काम गर्न चाहानेहरुका लागि गाउँपालिका सधैं साथमा रहेको उहाँको भनाई छ । त्यस्तै २० रोपनी भन्दा बढी जग्गामा खेती गर्ने किसानहरूले गाउँपालिकाबाट निशुल्क प्राबिधिक सेवा प्राप्त गर्ने गरि पालिकाको नीति तथा कार्यक्रममै समावेश रहेको पनि उहाँले जानकारी दिनुभयो । मलका लागि स्थानीय सरकार पनि माथिल्लो तहमै भर पर्नुपर्ने अवस्था रहेकोले यो समस्या आएको उहाँले बताउनुभयो ।
राष्ट्रिय कृषक समूह महासंघ इन्द्रावतीका अध्यक्ष रत्न प्रसाद चौलागाईंले पालिकाले कृषि क्षेत्रमा बजेट बिनियोजन गर्न कन्जुस्याइँ गरेको गुनासो गर्नुभयो । किसानहरु सबै हिसाबले कमजोर ब्यक्ति भएको भन्दै उनिहरुप्रती हेर्ने दृष्टिकोणमा सुधार हुनुपर्ने उहाँको धारणा थियो । साथै आफ्नो चार वर्षको कार्यकालमा १० नम्बर वडामा जिबिकोपार्जन सम्बन्धि काम गरेको र बजेट अभावकै कारण अन्य कार्यक्रमहरु गर्न नसकेको बताउनुभयो ।
कार्यक्रममा उपस्थित भएकाहरुले समयमा मल नपाउने समस्या र बन्यजन्तुले दुख दिने समस्याहरु राखेका थिए । साथै अब पालिकाको बजेट पनि परिचालन गर्न सक्ने गरि समन्वय गर्ने खालको समिती निर्माण हुनुपर्ने धारणा राखेका थिए ।
भेलाले ज्ञान बहादुर गिरीको अध्यक्षतामा समिती पनि गठन गरेको छ । समितीको उप–अध्यक्षमा सुमित्रा दुलाल, सचीवमा नेत्र प्रसाद आचार्य, सह–सचीवमा दिपा दुलाल र कोषाध्यक्षमा लक्ष्मी देबि कोइराला सर्वसम्मत चयन हुनुभएको छ । ११ सदस्यीय समितीमा सदस्यहरू ध्रुब कटुवाल र अप्सरा घिमिरे सर्वसम्मत चयन हुनुभएको छ भने चार जना सदस्य पछि मनोनित गरिने महासंघका जिल्ला सचीव तथा कार्यक्रम सञ्चालक रामप्रसाद गौतमले जानकारी दिनुभयो ।
