रेडियो मिसन काठमाडौ ।
सिन्धुपाल्चोक निर्वाचन क्षेत्र नं १ बाट निर्वाचित प्रतिनिधि सभा सदस्य माधव सापकोटा सुबोध संघीय संसद सचिवालयमा आफ्नो सम्पत्ति विवरण बुझाउने पहिलो सांसद बन्नुभएको छ ।
सार्वजनिक पद धारण गरेको व्यक्तिले ६० दिन भित्र सम्पत्ति विवरण बुझाउनुपर्ने कानुनी व्यवस्था छ । यही व्यवस्था अनुसार आफूले संसद सचिवालयमा सम्पत्ति विवरण बुझाएको सांसद सापकोटाले बताउनुभयो । उहाँ माओवादीबाट निर्वाचित सांसद हुनुहुन्छ ।
संसद सचिवालयका अनुसार गत ४ मंसिरमा सम्पन्न आम निर्वाचनबाट चुनिएर आएका २७५ प्रतिनिधिसभा सदस्यहरुमध्ये सिन्धुपाल्चोकबाट निर्वाचित सापकोटाले सबैभन्दा पहिले सम्पत्ति विवरण बुझाएका हुन् ।
‘पारदर्शिता र सुशासनको विषय उठाएर चुनाव जितेको हुँ । भोलि ९सोमबार०बाट अधिवेशन सुरु हुँदैछ । त्यसअगावै सम्पत्ति विवरण बुझाएको छु’ सापकोटाले भन्नुभयो ।
सापकोटाले संसद सचिवालयमा बुझाएको विवरण अनुसार उनका बुबा हरिप्रसाद सापकोटाको नाममा सिन्धुपाल्चोकको बलेफीमा १ रोपनी र बुबाकै नाममा सिन्धुपाल्चोककै कुविण्डे र फुल्पिङकट्टीमा ५० रोपनी खेतबारी पैतृक सम्पत्ति छ ।
श्रीमतीको नाममा कागेश्वरी मनहरा नगरपालिकामा ४ आना जग्गा ऋण ९बैंक लोन० लिएर खरिद गरेको उल्लेख छ। श्रीमतीकै नाममा भक्तपुरमा ५ आना जग्गा व्यवसायका लागि लिएको पनि विवरणमा समावेश छ । दाइजो र खरिद गरेको समेत गरी १० तोला सुन, एभरेष्ट बैंकमा आफ्नै नाममा ३ लाख रुपैयाँ नगद रहेको बताउनुभएका सापकोटाको नाममा सिन्धुपाल्चोक जलविद्युत कम्पनीको शेयर रहेको उल्लेख छ ।
काठमाडौंको घर निर्माणका लागि तीन जनासँग ९५ लाख ऋण लिएको पनि विवरणमा समावेश छ । सवारीसाधनतर्फ ल्याण्डकुजर जीप र श्रीमतीको स्कुटर, यसका अलावा ल्यापटप, प्रिन्टर लगायतका व्यक्तिगत प्रयोजनका सामाग्रीहरु रहेको विवरणमा उल्लेख छ ।
