चौतारा – गरे के हुँदैन ? यसको गतिलो उदाहरण बनेका छन्, इन्द्रावती गाउँपालिकाको गोसाइँकुण्ड सामुदायिक महिला केन्द्रका सदस्यहरू । उनीहरूले गाउँपालिका र कृषि ज्ञान केन्द्रको सहयोगमा व्यावसायिकरूपमा अदुवा खेती गर्न थालेपछि आम्दानी बढ्न थालेको छ ।
इन्द्रावती गाउँपालिकाको नवलपुर, पाडामरूवा, नयाँबस्ती, कुञ्चोक, बाँडेगाउँ र भोटसिपाका किसानले अदुवा खेतीलाई नगदेबालीका रूपमा विकास गर्दै लगेका छन् । अदुवाबाट हुने आम्दानीले आफ्नो आर्थिकस्तरमा समेत परिवर्तन आएको समूहकी अध्यक्ष जेठीमाया तामाङले बताउनुभयो ।
गाउँपालिकाको सहयोगमा एक हजार पाँच सय किलो अदुवा लगाउनुभएकी चित्रकुमारी खोखाली बजारमा अदुवाको राम्रो माग आएपछि खुसी हुनुहुन्छ । अघिल्लो वर्ष बजार भाउ राम्रो पाएपछि यो वर्ष समूह नै बनाएर व्यावसायिकरूपमा अदुवा खेती गर्न थालेको उनले बताउनुभयो ।
कोदो, मकैभन्दा दोब्बर फाइदा हुने खोखालीले बताउनुभयो। उहाँका अनुसार उत्पादनभन्दा बजारमा अदुवाको माग बढी रहेको छ । अहिले २९ किसानले व्यावसायिकरूपमा अदुवा खेती गरिरहेका छन् ।
