सिन्धुपाल्चोक
सिन्धुपाल्चोकको इन्द्रावती गाउँपालिका वडा नम्बर ७ मा रहेका विद्यालयका २९ जना अति विपन्न तथा जेहेन्दार विद्यार्थीहरूलाई शैक्षिक सामग्रीसहित विद्यालय झोला वितरण गरिएको छ। विशेष गरी द्वन्द्वपीडित, आर्थिक अवस्था अत्यन्त कमजोर भएका र अभिभावक (आमाबुबा) नभएका बालबालिकाहरूलाई लक्षित गरी यो सहयोग प्रदान गरिएको हो।
कार्यक्रममा जम्मा २९ जना विद्यार्थीहरूलाई सहयोग प्रदान गरिएको थियो जसमा श्री राजेश्वरी माध्यमिक विद्यालयका २१ जना
बालबालिका सुधार प्राथमिक विद्यालयका ५ जना र अन्य ३ जना लाई सहयोग गरीएको हो । यो मानवीय कार्यका लागि अमेरिकामा बसोबास गर्नुहुने ड्रेगन इन्स्योरेन्स (Dragon Insurance) का सञ्चालक राज बरालले स्टेशनरी सामग्री र झोला सौजन्य गर्नुभएको हो। विदेशमा रहेर पनि आफ्नो जन्मभूमि र त्यहाँका बालबालिकाको शिक्षाप्रति देखाउनुभएको यो सद्भावको स्थानीय स्तरमा उच्च प्रशंसा गरिएको छ।
सामग्री वितरण कार्यक्रम इन्द्रावती गाउँपालिका वडा नं. ७ का वडा अध्यक्ष रविन्द्र कुमार खाति र समाजसेवी तथा युवा व्यवसायी रमेश दंगालको प्रमुख आतिथ्यमा सम्पन्न भएको थियो। वडा अध्यक्ष खाति र व्यवसायी दंगालले विद्यार्थीहरूलाई संयुक्त रूपमा सामग्री हस्तान्तरण गर्नुभएको थियो। कार्यक्रममा बोल्दै वडा अध्यक्ष रविन्द्र कुमार खातिले अमेरिकामा रहेर पनि गाउँका गरिब र टुहुरा बालबालिका सम्झिएकोमा राज बराललाई विशेष धन्यवाद दिनुभयो। यस्तै, समाजसेवी रमेश दंगालले आगामी दिनमा पनि यस्ता सामाजिक कार्यहरूमा निरन्तर समन्वय गरिरहने प्रतिबद्धता व्यक्त गर्नुभयो।
