रेडियो मिसन, नवलपुर ।
बागमती प्रदेशका संसद् कृष्ण कुमार तामाङ समीर ले विकासका लागी बजेट ल्याउने बागमती प्रदेश भित्रका जिल्लाहरूमध्ये सिन्धुपाल्चोक एक नम्बरमा रहेको बताउनुभएको छ । यो आफ्नो मात्रै सक्रियतामा नभई यहाँका सबै नेताहरुको देन भएको उहाँको भनाई छ । इन्द्रावती गाउँपालिका ५ मा रहेको जनसुधार आधारभूत विद्यालयको स्वर्ण जयन्ती महोत्सव तथा अभिभावक भेलामा सोमबार आफ्नो भनाई राख्दै सांसद तामाङले यस्तो बताउनुभएको हो ।
बागमती प्रदेश भित्रका १३ ओटा जिल्लाहरु मध्ये सिन्धुपाल्चोक धेरै बजेट ल्याउने जिल्लाहरुमा एक नम्बरमा रहेको छ, यो तपाईहरुले गर्नुभएको बिश्वास र यहाँका नेताहरुको देन भएकोे, उहाँको भनाई छ । साथै जिल्लाका समस्याहरु बिस्तारै समाधान गर्दै जाने बताउँदै एक वर्षे कार्यकालको बजेट चलाउने अवसर पाउँदा जिल्लामा गरेका प्रतिबद्धताहरु पनि क्रमगत रुपमा पुरा गर्दै लगेका उहाँले दाबी गर्नुभयो ।
सांसद तामाङले विकासका लागी युवाहरू अग्रसर हुन जरुरी रहेको बताउनुभयो । अग्रजको सम्मान गर्दै युवाहरू अघि बढ्नुपर्नेमा जोड दिँदै बिकासले अहिले युवाको अनुहार कुरी रहेको धारणा राख्नुभयो । साथै आफूले पनि आफ्नो व्यक्तिगत चाहाना मारेर विकासको लागी लागी परेकोले सबैले यो ठाउँमा पुग्न सहयोग गरेको बताउनुभयो ।
त्यस्तै आधारभूत तह सम्मका विद्यालयहरू स्थानीय सरकार मातहत रहने बताउँदै स्थानीय तहसँग सहकार्य गरी शैक्षिक गुणस्तर सुधारका लागी अघि बढ्ने बताउनुभएको छ । विद्यालयको भव्य भौतिक संरचना देख्दा खुसी लागेको बताउँदै सांसद तामाङले विद्यालयमा रहेको खानेपानीको समस्या समाधानका लागी सहयोग गर्न तयार रहेको बताउनुभएको छ ।
स्थानीय तहले पनि समस्या समाधानको लागी प्रयास गइनुपर्ने बताउँदै उहाँले भन्नुभयो, “यहाँको खानेपानी समस्या समाधानको लागी स्थानीय तह पनि तयार रहनुस्, यदि धेरै लागत लाग्ने भयो भने त्यसको लागी चिन्ता लिनु पर्दैन म छु,” । स्वच्छ खानेपानीबाट बिद्यार्थीहरु वञ्चित हुन नहुने बताउँदै मुहानको व्यवस्था भएमा आवश्यक रकमको व्यवस्था प्रदेश सरकारले गर्ने उहाँले प्रतिबद्धता जनाउनुभयो । “मुहान मिलाउने जिम्मा तपाईँहरू लिनुस्, मुहान भएपछि बजेटको अभावमा खाने पानीबाट बिद्यार्थीहरुलाई वञ्चित हुन नदिने जिम्मा मेरो भयो,” उहाँले भन्नुभयो ।
कार्यक्रममा गाउँपालिका उपाध्यक्ष सोभना तामाङ, गाउँपालिकाका प्रवक्ता तथा वडा नम्बर ५ का अध्यक्ष शशिनाथ आचार्य लोकतान्त्रिक खेलकुद परिषद्का केन्द्रीय सदस्य अण लामा लगायतले आफ्नो भनाई राख्नुभएको थियो ।
