रेडियो मिसन, मेलम्ची ।
मेलम्ची नगरपालिकाका ४ जना कृषकहरू सम्मानित भएका छन् । नगरपालिकाको १४ औं अधिवेशनको अवसरमा शनिबार किसानहरूलाई सम्मान गरीएको हो ।
सम्मानित हुनेमा मेलम्ची नगरपालिका वडा नम्बर ५ का कृष्णजंग रायमाझी, वडा नम्बर १२ का कमलप्रसाद चालिसे, मेलम्ची ११ का कृष्णप्रसाद दुलाल र बिष्णुप्रसाद दुलाललाई नगर प्रमुख किसान सम्मान कार्यक्रम अन्तर्गत नगद १५ हजार रुपैयाँसहित सम्मान गरीएको हो । उहाँहरूले फलफुलजन्य र दुधजन्य उत्पादन गर्दै आउनुभएको छ ।
कृषकहरूलाई गरिरहेको काममा हौसला थप्दै नयाँलाई पनि कृषि कर्ममा लाग्न उत्प्रेरणा दिनको लागि यो काम सुरू गरीएको नगरप्रमुख आईतमान तामाङले बताउनुभयो । समृद्ध मेलम्ची बनाउन कृषि उत्पादन निर्यातलाई प्राथमिकतामा राखेर काम गरिरहेको उहाँले बताउनुभएको छ ।
नगरसभा उद्घाटन कार्यक्रममा नेपाल सरकारका स्वास्थ्य तथा जनसंख्या मन्त्री मोहन बहादुर बस्नेत, पुर्वमन्त्रि शेर बहादुर तामाङ, प्रदेश सांसद कृष्णकुमार तामाङ र मेलम्ची नगरपालिकाका प्रमुख आईतमान तामाङले सम्मान पत्र हस्तान्तरण गर्नुभएको हो ।
