रेडियो मिसन, नवलपुर ।
इन्द्रावती ५ का कुमार आचार्यले आफ्नो जन्मदिनको अवसरमा बिद्याथीहरुलाई स्टेसनरी सामाग्री वितरण गर्नुभएको छ । आचार्यले जनसुधार निम्न माध्यमिक विद्यालय धुसेनीका कक्षा १ देखि ८ सम्मका २० विद्यार्थीलाई स्टेशनरी सामान वितरण गर्नुभएको हो ।
विद्यालयमा आज आयोजित सरस्वती पूजाको अवसर पारेर उहाँले स्टेशनरी सामाग्री हस्तान्तरण गर्नुभएको हो ।
‘जन्मदिनको अवसरमा जेहनदार विद्यार्थीका लागि हौसला बढाउन केही स्टेशनरी सामाग्री हस्तान्तरण गरेको छु, यसमा खुसी छु, जन्मदिन मनाउने नाममा अनावश्यक खर्च गर्नुको साटो केही फरक र केही नयाँ गरौँ भन्ने लागेरगरेको हुँ’,आचार्यले भन्नुभयो ।
उहाँले जन्मदिनलाई उत्सवको रूपमा मनाउँदै समाजसेवामा गर्दा आनन्दको महसुस हुने बताउनुभयो । आचार्यले अब प्रत्येक वर्षको जन्मदिनलाई समाजसेवामा लगाएर मनाउने अठोट गरेको सुनाउनुभयो । उहाँले २० विद्यार्थीलाई कपि र कलम हस्तान्तरण गर्नुभएको थियो ।
युवा ब्यवसायी तथा मिश्रित पशुपालन तथा कृषि फार्म सञ्चालक समेत रहनुभएका आचार्यले केही समय अगाडी मात्रै पूर्व प्रधानमन्त्री तथा नेकपा समाजबादीका अध्यक्ष माधव कुमार नेपालबाट उत्कृष्ट युवा उद्यमीको सम्मान प्राप्त गर्नुभएको थियो ।
