गाेल्मेश्वरीमा विद्यार्थी पोसाक वितरण, शैक्षिक गुणस्तर सुधार गर्न नगर प्रमुख तामाङको जोड

* # पालीका खबर शिक्षा समाचार समाज सिन्धुपाल्चोक

मेलम्ची नगरपालिका वडा नं. ९ ज्यामिरे डब्ल्याङ मानेडाँडास्थित श्री गोल्मेश्वरी आधारभूत विद्यालयमा विद्यार्थी पोसाक वितरण एवम् सहयोगदाता सम्मान कार्यक्रम सम्पन्न भएको छ ।


कार्यक्रमलाई सम्बोधन गर्दै मेलम्ची नगरपालिकाका प्रमुख आइतमान तामाङले शैक्षिक गुणस्तर सुधार्न सरोकारवाला सबैको साझा प्रयत्न हुनुपर्नेमा जोड दिनुभएको छ । उहाँले शिक्षासँग सरोकार राख्ने जनप्रतिनिधि, विद्यालय व्यवस्थापन समिति, शिक्षक अभिभावक संघ, आमा समूह, प्रधानाध्यापक , शिक्षक, बाल क्लब , अभिभावक लगायत सरोकारवाला सबै शैक्षिक गुणस्तर अभिवृद्विका लागि अभिन्न अङ्ग रहेको बताउनुभयो ।


प्रमुख अतिथि तामाङले शिक्षामा गुणस्तर नहुनुमा एक अर्को बिचको दोषारोपण मुख्य समस्याको रूपमा औंल्याउनु भयो । ‘ अभिभावकले शिक्षकलाई दोष दिने, शिक्षकले विद्यार्थी र अभिभावकलाई दोष दिने, प्रधानाध्यापक र विव्यसले वडा/ नगरपालिकालाई दोष दिने प्रवृत्ति छ ।’ नगर प्रमुख तामाङले भन्नुभयो-‘ दोष एक पक्षको मात्र छैन, सबै पक्षको छ ।

दोषारोपण मात्र गरिरह्यो भने समस्या जहाँको तहाँ र ज्यूँको त्यूँ रहन्छ ।’ उहाँले हरेक पक्षले दोष र कमी कमजोरीको स्वमूल्याङ्कन गर्दै समाधानको पक्षमा अघ बढ्न समन्वयकारी भूमिकाको आवश्यकता रहेको बताउनुभयो ।


कार्यक्रमका विशेष अतिथि मेलम्ची नगरपालिका वडा नं. ९ का वडा अध्यक्ष किरणदीप खड्काले विद्यालयमा अध्ययनरत छात्रछात्राहरुको शिक्षण सिकाइलाई प्रभावकारी बनाउँदै नियमित विद्यालय पोसाकको माध्यमबाट कक्षाकोठाको वातावरण अनुशासित र मर्यादित भइ शैक्षिक गुणस्तरका लागि विद्यार्थी पोसाक फलदायी बन्ने विश्वास व्यक्त गर्नुभयो ।

अर्का विशेष अतिथि वडा नं. १० का वडा अध्यक्ष अमृत खनालले भविष्यका कर्णधार बालबालिकाको शिक्षा दिने कुरामा कसैले खेलवाड नगरी दिन हुन सचेत गराउनु भयो ।

कार्यक्रममा शिक्षा, युवा तथा खेलकुद शाखाका प्रमुख सुधिनराज बुढाथोकीले सामुदायिक विद्यालयमा बर्षेनी नतिजा खस्किएकोमा चिन्ता व्यक्त गर्दै नतिजा बिग्रनुमा सरोकारवाला सबै दोषी रहेकोले आ- आफ्नो जिम्मेवारी पुरा गर्न सबैलाई आग्रह गर्नुभयो । उहाँले कार्यक्रममा अभिभावकको उल्लेखनीय उपस्थित नदेखेपछि विद्यालयमा अभिभावकको सक्रियता बढाउनु पर्नेमा जोड दिनुभयो । शिक्षा अधिकृत बुढाथोकीले आफ्नो जन्मदिनको उपलक्ष्यमा विद्यालयलाई पाँच हजार आर्थिक सहयोग समेत प्रदान गर्नुभयो ।

कार्यक्रममा पूर्व वडाअध्यक्ष कमलबहादुर खड्का, मेत्ता भोलेन्टियर्सका अध्यक्ष गौतम महर्जन लगायतले शुभकामना मन्तव्य राख्नु भयो । ट्याक्सुट, टिसर्ट मेत्ता भोलेन्टियर्स, ललितपुरसँगको साझेदारीमा र सर्ट, पाइन्टको कपडा भने विद्यालयको स्रोतबाट मात्र व्यहोरिएको प्रधानाध्यापक कुमार तामाङले जानकारी दिनुभयो ।


यसै कार्यक्रमका बिच विद्यालय व्याज-२०५५ को तर्फबाट सुनीलकुमार भण्डारीले खेलकुद र केहि शैक्षिक सामग्री हस्तान्तरण गर्नुभएको छ । भण्डारीले पूर्व विद्यार्थी समाजको समेत परिकल्पना गरी त्यसको संयोजनकारी भूमिका निर्वाह गरी रहेको कार्यक्रममा जानकारी दिनुभयो । पूर्व विद्यार्थी समाजको ब्यानर अनावरित समेत गरिएको छ । कार्यक्रम विद्यालय व्यवस्थापन समिति अध्यक्ष नारायण भण्डारीको सभाध्यक्षतामा सम्पन्न भएको थियो ।

Leave a Reply