रेडियो मिसन ।
मेलम्ची । सिन्धुपाल्चोकको मेलम्ची नगरपालिकाले एसईईमा उत्कृष्ट अंक ल्याउने मेलम्ची नगरपालिका भित्रका २ विद्यार्थी र ३.६ भन्दा बढी जिपिए ल्याउने ३० जना गरि ३२ जना विद्यार्थीलाई सम्मान गरेको छ ।
माध्यमिक शिक्षा परीक्षा एसईई २०८०, बधाई तथा सम्मान कार्यक्रम आयोजना गरि नगरपालिकाले एसईईमा ३.६ भन्दा बढी जिपिए ल्याउने ३२ जना विद्यार्थी र २ विद्यालयका शिक्षकलाई सम्मान गरिएको मेलम्ची नगरपालिकाका शिक्षा अधिकृत सुधिनराज बुढाथोकीले जानकारी दिनुभयो ।
मेलम्ची नगरपालिकाकै उत्कृष्ट नतिजा ल्याउने छात्र तर्फ महाकाली मावि, मेलम्ची १२ गिरान्चौर बाट ३.९१ जिपिए ल्याउने मनोज तिवारीलाई उत्कृष्ट छात्रको रूपमा सम्मान गरिएको थियो । त्यस्तै तेर्से मावि, मेलम्ची ६ तालामाराङ बाट ३.८६ जिपिए ल्याउने सोनी तामाङलाई उत्कृष्ट छात्राको रूपमा सम्मानित गरिएको थियो । उनिहरुलाई नगद सहित सम्मान गरिएको हो ।
मेलम्ची कम्युनिटि अंग्रेजी माध्यमिक विद्यालय बाट एसईईमा १४ जनाले परिक्षा दिएकोमा १४ जना पास हुन सफल भएकोमा विद्यालयलाई सम्मान गरिएको थियो । त्यस्तै सामुदायिक विद्यालय तर्फ तेर्से माविमा ५२ जनाले एसईई परिक्षा दिएकोमा ४८ जना उत्तिर्ण भई ९२ प्रतिशत ल्याउन सफल भएको थियो ।
सम्मान कार्यक्रममा स्वागत मन्तव्य राख्दै शिक्षा अधिकृत सुधिनराज बुढाथोकीले आफुलाई यो दिन उत्साहको दिन लागेको बताउनुभयो । प्रअको प्रागिक र प्रशासनीक कुशलताका कारण विद्यार्थीहरु सम्मान ग्रहण गर्ने स्थानमा पुगेको भन्दै उनले खुसी व्यक्त गर्नुभयो । भोलिका दिनमा राष्ट्रिय र अन्तर्राष्ट्रिय रूपमा ख्याती प्राप्त गरेर नगरले सम्मान गर्न पाओस भन्दै उनले विद्यार्थीलाई शुभकामना व्यक्त गर्नुभयो । ‘अब विद्यार्थीको सिकाईमा जोड दिनुपर्छ’, उहाँले भन्नुभयो ‘अभिभावक संगको सम्बन्ध कसरी राम्रो बनाउन सकिन्छ शिक्षकले त्यो कुरामा ध्यान दिनुपर्छ’ ।
सम्मान कार्यक्रममा भनाई राख्दै मेलम्ची नगरपालिकाका प्रमुख आइतमान तामाङले नगरभरिका विद्यालयमा एसईईमा ३.६ भन्दा धेरै जिपिए ल्याउने ३२ जना विद्यार्थीलाई सम्मान गर्न पाउनु सुखद कुरा भएको बताउनुभयो । आफु निर्वाचित भएको पहिलो र दोस्रो कार्यकालमा नितिगत कुराहरूमा व्यस्त भएकाले यो सम्मान कार्यक्रम राख्न नपाएको र तेस्रो बर्षमा मात्र सम्मान कार्यक्रम राखेको जानकारी दिनुभयो । सो अवसरमा प्रमुख तामाङले विद्यार्थीले मेलम्ची नगरपालिकाको सान राखिदिएकोमा धन्यवाद ज्ञापन गर्नुभयो । मेहनती विद्यार्थी र आर्थीक अवस्था कम भएकोलाई छात्रवृत्ति दिने उनले प्रतिवद्धता व्यक्त गर्नुभयो । एसईईमा यो बर्ष नगरपालिकामा ५०.८% पास भएको र अर्काे बर्ष ७०% भन्दा माथी नतिजा ल्याउने गरि काम गर्नुपर्ने उहाँको धारणा छ । आगामी दिनमा विषयगत शिक्षक र आधारभुत तहका उत्कृष्ट विद्यार्थीलाई पनि सम्मान गर्ने मेयर तामाङले प्रतिवद्धता व्यक्त गर्नुभयो ।
मेलम्ची नगरपालिकाका उपप्रमुख उमा प्रधानले सम्मानित हुने सबै विद्यार्थीलाई बधाई दिँदै आगामी दिनमा यो भन्दा धेरै सफलता प्राप्त गर्न शुभकामना व्यक्त गर्नुभयो । सामुदायिक विद्यालयमा पढेका विद्यार्थीले ३.९१ जिपिए ल्याउन सफल हुनु नगरपालिकाकै गौरवको बिषय भएको उहाँले बताउनुभयो ।
त्यस्तै शिक्षक पेशागत महासंघका जिल्ला अध्यक्ष कुमार प्रसाद खतिवडाले अभिभावकको साथ र विद्यार्थीको लगनशिलता तथा मेहनतले यो उपलब्धि हासिल भएको बताउनुभयो । ‘धेरै उपलब्धि हाँसिल गर्न बाँकी छ, यो पहिलो ढोका हो’, उहाँले भन्नुभयो । सिकाई सुधारको लागि थप मेहनत गर्न आवस्यक रहेको बताउँदै खतिवडाले विषयगत शिक्षकलाई पनि सम्मान गर्न सकेमा आत्मविश्वास बढ्ने धारणा व्यक्त गर्नुभयो । राष्ट्रको नतिजा भन्दा मेलम्चीको नतिजा राम्रो भएको उहाँको भनाई छ ।
कार्यक्रममा नगरभरिमै उत्कृष्ट नतिजा ल्याउने छात्र तर्फ महाकाली मावि, मेलम्ची १२ गिरान्चौरका मनोज तिवारी र छात्रा तर्फ तेर्से मावि, मेलम्ची ६ तालामाराङकी सोनी तामाङले मन्तव्य राख्नुभएको थियो । सो कार्यक्रममा मेलम्ची नगरपालिकाका प्रमुख प्रशासकीय अधिकृत असोक कुमार भट्टराई, वडा अध्यक्षहरु, शिक्षक, विद्यार्थी, पत्रकार लगायतको उपस्थिति रहेको थियो । कार्यक्रमको सञ्चालन राजश्व शाखाका प्रमुख राजेन्द्र दुलालले गरेका थिए । कार्यक्रमको अध्यक्षता मेलम्ची नगरपालिकाका प्रमुख आइतमान तामाङले गर्नुभएको थियो ।
