नेपाली कांग्रेस, प्रतिनिधिसभा निर्वाचन क्षेत्र नम्बर २, सिन्धुपाल्चोकको क्षेत्रीय कार्यसमितिले शनिबार पूर्ण बैठक तथा भेला सम्पन्न गरेको छ। बागमती प्रदेशका खानेपानी, ऊर्जा तथा सिंचाई मन्त्री माननीय कृष्णकुमार तामाङको सहभािगतामा भएको उक्त कार्यक्रमको अध्यक्षता क्षेत्रीय सभापति आइतमान तामाङले गर्नुभएको थियो।
महाधिवेशन र संगठन सुदृढीकरण आजको पूर्ण बैठकले पार्टीको आन्तरिक जीवन र संगठन सुदृढीकरणका सम्बन्धमा महत्त्वपूर्ण निर्णयहरू गरेको छ । १५औं महाधिवेशन नियमित समयमै: बैठकले नेपाली कांग्रेसको १५औं महाधिवेशन विधानअनुसार नियमित समयमै सम्पन्न हुनुपर्ने अडानसहितको निर्णय गरेको छ। यदि नियमित समयमा महाधिवेशन हुन नसकेमा भने केन्द्रीय कार्यसमितिले गर्ने निर्णयलाई स्वीकार गर्ने निर्णय पनि गरिएको छ।
पार्टीका सबै तहलाई चलायमान बनाई संगठन विस्तार गर्ने निर्णय भएको छ। यसका लागि महाधिवेशन प्रतिनिधि र क्षेत्रीय कार्यसमितिका पदाधिकारीहरूलाई पालिका तथा वडा तहमा खटाउने योजना बनाइएको छ। युवा परिचालन (NC GenZ): सिन्धुपाल्चोक क्षेत्र नम्बर २ का ४९ वटै वडामा प्रति वडा २५ जनाका दरले ‘एनसी जेन्जी’ (NC GenZ) गठन गरी कुल १२२५ जना युवाहरूलाई पार्टी गतिविधिमा क्रियाशील बनाउने निर्णय भएको छ। निर्वाचन सफलता र बजेट कार्यान्वयन: आगामी फागुन २१ गतेको निर्वाचनलाई सफल बनाउन सम्पूर्ण शक्ति लगाउने निर्णय गरिएको छ। बागमती प्रदेशबाट विनियोजन भएका योजनाहरू समयमै सम्पन्न गर्नका लागि समन्वय गर्ने निर्णय पनि बैठकले गरेको छ।
बजेट कार्यान्वयनमा अन्तरक्रिया बैठकको महत्त्वपूर्ण पक्षको रूपमा बागमती प्रदेश सरकारबाट विनियोजित बजेट कार्यान्वयनको सम्बन्धमा अन्तरक्रिया कार्यक्रम पनि सम्पन्न भएको थियो। यसमा स्थानीय स्तरमा भइरहेका विकास निर्माण कार्यको प्रगतिको समीक्षा र कार्यान्वयनमा देखिएका चुनौतीहरूमाथि छलफल भएको थियो।
आजको पूर्ण बैठक तथा अन्तरक्रिया कार्यक्रममा पार्टीका विभिन्न तहका नेता तथा प्रतिनिधिहरूको बाक्लो उपस्थिति रहेको थियो। कार्यक्रममा महासमिति सदस्यहरू, महाधिवेशन प्रतिनिधिहरू, क्षेत्रीय कार्यसमितिका पदाधिकारीहरू, प्रदेश क्षेत्रीय कार्यसमितिका सभापतिहरू, गाउँपालिका/नगरपालिका सभापतिहरू, वडा कार्यसमितिका सभापतिहरू तथा पार्टीका तर्फबाट निर्वाचित जनप्रतिनिधिहरूको सहभागिता रहेको थियो।
नेपाली कांग्रेस सिन्धुपाल्चोक क्षेत्र नम्बर २ ले महाधिवेशनको मिति नियमित समयमै हुनुपर्ने माग राखेर र युवाहरूलाई जोड्ने नयाँ रणनीति अपनाएर पार्टीलाई थप सशक्त बनाउने दिशामा कदम चालेको छ।
