रेडियो मिसन ।
मेलम्ची नगरपालिकाले लैङ्गिक हिंसा विरुद्धको १६ दिने अभियानलाई भव्यताका साथ मनाउने भएको छ । मेलम्ची नगरपालिकाकी उपप्रमुख उमा प्रधानको प्रमुख आतिथ्यतामा शुक्रवार (आज) बसेको बैठकले ९ मङ्सिरदेखि २४ गतेसम्म ‘लैङ्गिक हिंसा अन्त्यको सुनिश्चितता, महिला र बालबालिकामा लगानीमा ऐक्यबद्धता’भन्ने मूल नाराका साथ १६ दिने कार्यक्रम गर्ने भएको हो । नगरपालिकाले सम्बन्धित सरोकारवालाको उपस्थितिमा अन्तरक्रिया कार्यक्रम गरेर कार्यक्रमको शुभारम्भ गर्ने भएको छ । बैठकले १६ दिनसम्म विभिन्न कार्यक्रम गरेर लैङ्गिक हिंसा विरुद्ध कार्यक्रम गर्ने भएको हो ।
लैङ्गिक हिंसा न्यूनीकरण सम्बन्धी माध्यामिक विद्यालयहरूमा चेतनामूलक सडक नाटक प्रस्तुत,विद्यालय स्तरमा वक्तृत्वकला प्रतियोगिता,दिवसको अवसरमा अन्तरक्रिया कार्यक्रम,अपाङ्गता भएका व्यक्तिका लागि वडा स्तरीय स्वास्थ्य शिविर सञ्चालन,अपाङ्गता भएका व्यक्तिहरूको सफलताको कथा रेडियो कार्यक्रमलगायत सञ्चालन गर्ने निर्णय गरेको मेलम्ची नगरपालिकाका कर्मचारी अम्बिका डोटेलले जानकारी दिनुभयाे । बैठकमा नगरपालिका प्रमुख प्रशासकीय अधिकृत निमेष मिश्र,प्रशासकीय अधिकृत झपेन्द्रराज खरेल,सम्बन्धित शाखाका कर्मचारीहरू,विभिन्न सङ्घसंस्थाका अध्यक्ष तथा प्रतिनिधिहरू,नगरस्तरीय अपाङ्ग सञ्जालका अध्यक्ष ,सदस्यहरू लगायतको उपस्थिति रहेको थियो ।
