रेडियो मिसन, नवलपुर
ईन्द्रावती गाँउपालीकाले आमाबाबु विहीन बालबालीकाहरुको शंरक्षणमा अग्रसरता देखाएको छ । बागमती प्रदेश सरकारबाट सशर्त अनुदान प्राप्त कार्यक्रम अनुसार गांउपालिकाले यो कामको सुरुवात गर्न लागेको हो ।
गाउँपालीकाभित्रका आमा बाबु दुवै गुमाएका बालबालिकाको स्वास्थ्य, शिक्षा र पोषणको सुनिश्चितताका लागि आमा बाबु विहिन बालबालिका संरक्षण कार्यक्रम सञ्चालन हुने गाँउपालीकाका अध्यक्ष झम्कनाथ नेपालले बताउनुभयो । बालबालिकाहरुको संरक्षक वा स्याहार सुसार गर्ने व्यक्तिले गाँउपालीकामा सम्पर्क गर्न सकीने अध्यक्ष नेपालले बताउनुभयो । सम्बन्धित वडा कार्यालय मार्फत गाउँपालीकामा निवेदन पेश गरेर सुविधा लीन सकीने उहाँले बताउनुभएको छ । आँउदो शैक्षिक सत्रबाट कार्यक्रम लागु हुने अध्यक्ष नेपालले बताउनुभयो ।
यो कार्यक्रम अन्र्तगत आमा र बाबु दुबैको मृत्यु भएको वा दुबै बेपत्ता भएको वा दुबैको संरक्षण र रेखदेखबाट बञ्चित भई अरुको संरक्षणमा रहेको, १८ वर्ष उमेर पुरा नगरेको, ५ वर्ष उमेर पुरा गरेको बालबालिकाको हकमा विद्यालय भर्ना भई नियमित विद्यालय जाने गरेको, कुनै गैरकानुनी वा अपराधिक कार्यमा संलग्न नभएका बालबालीकाहरुले सेवाको उपभोग गर्न सक्ने गाँउपालीकाका प्रमुख प्रशासकीय अधिकृत रामप्रसाद शर्माले बताउनुभयो ।
आमा बाबु दुबैको मृत्युदर्ता प्रमाणपत्रको प्रतिलिपी वा बाबु र आमा दुवै बेपत्ता भएको वा दुबैको रेखदेखबाट बञ्चितीमा परेको प्रमाणित कागजात, बालबालिकाको जन्मदर्ता र संरक्षकको नागरिकताको प्रमाणपत्रको प्रतिलिपी र सम्बन्धित बालबालिकाको संरक्षक हो भनी वडा कार्यालयको सिफारिस पत्रको आधारमा मूल्याँकन गरीने अधिकृत शर्माले बताउनुभयो ।
