रेडियो मिसन ।
चौथो संस्करणको मालिकादेवी कप खुल्ला सेभेन ए साइड फुटबलको उपाधिका लागि सुनकोशी बी र धार्पा युथ क्लब बीच प्रतिस्पर्धा हुने भएको छ । दुबै टोलीले बिपक्षी टिमलाई पेनाल्टीमा परमजित गर्दै फाइनल यात्रा तय गरेको हो ।
फाइनल प्रवेशका लागि भएको पहिलो खेलमा राई बोइज एफसीलाई पेनाल्टी सुटआउटमा ४–३ ले पराजित गर्दै सुनकोशी बी फाइनल प्रवेश गरेको हो । निर्धारित समयको खेल गोलरहित बराबरीमा सकिएपछि पेनाल्टी मार्फत निर्णय लिन परेको थियो ।
त्यस्तै आजै भएको दोस्रो सेमिफाइनलमा चौतारा स्पोर्टिङ क्लबलाई पेनाल्टीमै ४–३ गोलले पराजित गर्दै धार्पा युवा क्लब फाइनल प्रवेश गरेको छ । उक्त खेलमा पनि निर्धारित समयमा कुनै टोलीले गोल गर्न नसकेपछि खेल ट्राइ ब्रेकरमा धकेलिएको थियो । ट्राइ ब्रेकरमा चौतारालाई पछि पार्दै धार्पाले सुनकोशी बि सँगको फाइनल भिडन्त पक्का गरेको हो ।
फाइनल खेल भोलि हुने आयोजकले जनाएको छ । विजेताले एक लाख ५५ हजार ५ सय ५५ रुपैयाँ प्राप्त गर्नेछन् । उपविजेताले ७७ हजार ७ सय ७७ रुपैयाँ पाउने आयोजकले जनाएको छ ।
